ԳՇ շտաբի պետի նախկին տեղակալ Տիրան Խաչատրյանն այսօր «Հայաստան» խմբակցության պատգամավորների հետ Եռաբլուրում էր: Նրան հարցրեցինք, թե ի՞նչ տեսակետ ունի ՔՊ խմբակցության պատգամավոր, ԱԺ պաշտպանության եւ անվտանգության հարցերի հանձնաժողովի նախագահ Անդրանիկ Քոչարյանի նախաձեռնության մասին՝ պարտադիր զինվորական ծառայությունից խուսափած, եռամսյա հավաքներին չմասնակցած ցուցարարներին գտնելու, մոբռեսուրսի մեջ ներգրավելու, հաշվառելու մասին: Տիրան Խաչատրյանը պատասխանեց. «Ես չգիտեմ՝ իր իրական նպատակն ինչում է կայանում, բայց կապել դա ցուցարարների հետ՝ միանշանակ խոսում է այն մասին, որ դա իր ձեւն է, որով փորձում է մարդկանց արտահայտման կամքի վրա բռնանալ, կամ եթե այլ հնչողություն չունենա՝ վախի տակ պահել: Հաշվառման վերցնել, ինչ-որ տեղ կցագրելը բոլորովին այլ կառույցների ֆունկցիաներ են: Դա մինչեւ այսօր կատարվել է ու բավականին լավ է կատարվել: Եթե Անդրանիկ Քոչարյանը մտածում է հաշվառման այլ ձեւ, ինչո՞ւ օրենսդրական նախաձեռնությամբ հանդես չի գալիս՝ այդ հարցն ավելի արդյունավետ լուծելու համար: Դա ուղղակի իր հերթական ոչ ճիշտ պահվածքի դրսեւորումներից է, որով փորձում է որոշակի վախի ազդեցություն ունենալ այն մարդկանց, վրա, ովքեր կարող են այդ ազդեցության տակ ընկնել»:
Հարցրեցինք՝ դուք տեղեկություններ ունե՞ք՝ ցուցարարների մեջ ավելի շա՞տ են բանակում չծառայածները, եռամսյա հավաքներից խուսափածները, քան ՔՊ կուսակցության, խմբակցության շրջանակներում են՝ Տիրան Խաչատրյանը պատասխանեց. «Հստակ չեմ կարող ասել, բայց ում հետ ես շփվում եմ, առնչություն ունեմ այս ընթացքում, խուսափողներ կամ խուսափածներ ինձ չեն հանդիպել ցուցարարների մեջ: Ասեմ ավելին՝ այն մարդիկ են, ովքեր միշտ պատրաստ են եղել ու հիմա էլ պատրաստ են ցույցերը թողնել անհրաժեշտության դեպքում ու եթե հայրենիքի պաշտպանության հարցում ունեն լուծելու խնդիր, ավելի արագ այդ գործում մասնակցություն ունենալ, քան ցույցեր»:
Հարցին՝ ցույցերով բանակին հե՞տ են գցում ընդդիմադիրները, բանակցային գործընթացը վատթարացնո՞ւմ են՝ Խաչատրյանը պատասխանեց. «Ընդհանրապես կարող է որոշակի առումով դրական ազդեցություն ունենալ քաղաքական հարցրի վրա: Եթե նույնիսկ այսօրվա իշխանություններն ունեն բաներ, որ բանակցեն հակառակորդ կամ թշնամի կողմի հետ երկմտանքի մեջ են, սա կարող է իրենց որոշակի ուժ տալ՝ պնդելու տեսակետ, պահանջ ներկայացնելու կամ չթելադրված վիճակից դուրս գալու համար: Եթե դուք գիտեք ինչ-որ բան, որ բացասական իմաստով կարող է ազդել, ես այդպիսի բան չեմ տեսնում ընդհանրապես: Սա ավելի ոգի բարձրացնող, ավելի միասնականության տանող երեւույթ է, որը միանշանակ ոչ միայն ժողովրդին կայացնելու, այլեւ պետականությունը ուժեղացնելու համար նպաստավոր է»:
Փոխանցեցինք՝ իշխանությունները պնդում են, որ ձեզանից ամեն մեկը իր պաշտոնի համար է պայքարում կամ թալանածը պահելու, թալանը հետ բերելու համար, օրինակ` դուք ինչի՞ համար եք պայքարում՝ Տիրան Խաչատրյանը պատասխանեց. «Զուտ այն հարցով, որ այսօրվա իշխանություններն իրենց վարած քաղաքականությամբ, իրենց պահվածքով, դրսեւորումներով չեմ տեսնում իրականում մի ազգանպաստ կամ պետականաշինությանն ուղղված ինչ-որ քայլ: Այսօրվա իշխանության լինելը, իրենց շարունակելը այդ գործունեության միայն վտանգավոր ու սպառնալի է մեր երկրի, մեր պետության ապագայի համար: Ես ի՞նչ պաշտոնի համար եմ պայքարում: Գիտեք, պաշտոնի հետ կապված ես շատ փակագծեր չբացեմ, շատ տարբեր, շատ հետաքրքիր հարցեր եղել են»:
Կարդացեք նաև
Ճշտեցինք՝ առաջարկնե՞ր են եղել պաշտոնի՝ նա չցանկացավ մանրամասնել. «Այս իշխանությունները, լավ, թեկուզ ինչ-որ բան գաղտնի են պահում, բայց չեն վարում այնպիսի քաղաքականություն, որը նպաստավոր կարող լինել: Այն մարդիկ, որոնք ուզում են ինչ-որ բան անել, հնարավո՞ր է միասին մի ուղղությամբ կամ մի ճանապարհով քայլել: Եվ ո՞նց կարող է լինի, որ ես իրենց հետ հետագա համագործակցության կամ ինչ-որ գործունեությամբ զբաղվելու քայլերի մեջ լինեմ: Կամ իմ հետ եղած, ինձ հետ համակարծիք մարդիկ; Ախր մենք բավականին երկար ժամանակ փորձել ենք, մոռանալով ամեն ինչի մասին՝ լինել իրենց հետ, որ ինչ-որ բան կարողանանք ի նպաստ երկրի, ժողովրդի անել, բայց չի՛ստացվում: Հավատացեք, որ չի ստացվում: Խաբելով, խոստումներ տալով, շեղելով, ինչ-որ մանր-մունր հարցերի վրա ուշադրություն դարձնելով՝ առաջնահերթ, գերակա խնդիրներից շեղելով մարդկանց՝ գործունեություն ծավալելը անիմաստ է: Իրենք պետք է գնան, որ լինեն կարող ուժեր, մտածող ուժեր, իրենց հնարավորությունը ներդնելով՝ այս վիճակից դուրս բերեն»:
Հռիփսիմե ՋԵԲԵՋՅԱՆ
