«Երեւանում եւ մարզերում մեկ շաբաթ է, որ մենք իրականացնում ենք տարբեր ակցիաներ եւ դուք նկատել եք, որ բավականին լուրջ քանակություն է հավաքվում»,- այսօր «Հաղթանակ» զբոսայգում լրագրողների հետ զրույցում ասաց «Հայաստան» խմբակցության ղեկավար Սեյրան Օհանյանը՝ չհամաձայնելով այն դիտարկումներին, որ ընդդիմության ցույցերին մարդկանց թիվը չի ավելանում, միշտ միեւնույն՝ ընդդիմադիր ուժերին համախոհների զանգվածն է հավաքվում:
«Ամեն օր գործողություններից հետո նստում, վերլուծում ենք, արդյունքներն ամփոփում ենք, նշում ենք դրականը, նաեւ այն բացթողումները, որոնք կան: Կարծում եմ, այս թափանիվը շարժվում է առաջ, մեր համակիրների թիվն ավելի է մեծանում»,- ասաց Սեյրան Օհանյանը՝ հավելելով, որ շարժումը մեկ անձի շարժում չէ, որ նախկին իշխանությունները, նախկին նախագահներն ամեն ինչ արել են, որ մենք արժեքներ ձեռք բերենք. «Մենք ձեռք ենք բերել անկախություն, ձեռք ենք բերել ինքնիշխանություն: Այդ տարիներին կանոնավոր բանակ է ձեւավորվել: Հաղթել ենք Արցախում, Արցախն ու Հայաստանը եղել են մեկ կուռ անվտանգային համակարգ: Այս իշխանությունների օրոք է, որ գալով իշխանության 2018-ին՝ իրենք իրենց որոշումներն իրականացրել են իրավիճակի ոչ սթափ գնահատման եւ ոչ սթափ կանխազգացումի արդյունքում: Ամեն ինչ արել են, որ բանակցային գործընթացը չլինի: Իսկ այնտեղ, որտեղ վերջանում են բանակցությունները՝ սկսվում են մարտական գործողությունները»:
Լրագրողներից մեկը հիշեցրեց խորհրդարանում նախագահ Սերժ Սարգսյանի արած հայտարարությունը, որը հաճախ հիշեցնում է նաեւ վարչապետ Նիկոլ Փաշինյանը, որ բանակցային գործընթացը տապալվել է, Սեյրան Օհանյանը հակադարձեց. «Սերժ Սարգսյանի օրոք բանակցային գործընթացը չի տապալվել, եղել են տարբեր փաստաթղթեր եւ տարբեր ատյաններում դրանք ուղղված են եղել միայն ու միայն Արցախի ինքնորոշումն առաջ տանելու: Այդ բանակցային գործընթացն է թույլ տվել, որ Արցախի ու Հայաստանի նկատմամբ լայնածավալ գործողություններ չլինեն: Այսօրվա իշխանություններն են, որ իրավիճակի ոչ սթափ գնահատմամբ բերել են նոր պատերազմի: Նրանք պատերազմի ողջ ընթացքում խրախուսել են նահանջը, Նիկոլ Փաշինյանն անձամբ, 4-րդ նախագահն անձամբ, իրենց ձեռքով՝ չտիրապետելով իրավիճակին, տվել են տարբեր կոչումներ»:
Նելլի ԳՐԻԳՈՐՅԱՆ
