Այսօր կեսօրին Երեւանի փողոցներով Դիմադրության շարժման կանանց խաղաղ քայլերթի մասնակից կանանց շարքերում գտնվող ԱԺ նախկին պատգամավոր, ՀՀԿ խորհրդի անդամ Մարգարիտ Եսայանը Սուրբ Սարգիս եկեղեցու բակում Aravot.am-ի հետ զրույցում անդրադարձավ իշխանական պատգամավորների այն հայտարարություններին, թե վերջին օրերին ընդդիմության բողոքի գործողությունների մասնակիցները նրանց բանդիտական խմբերն են:
«Իշխանական պատգամավորների որեւէ արտահայտություն մեկնաբանել իմ արժանապատվությունից ցածր եմ համարում: Բայց նաեւ չեմ կարող չհակադարձել, որովհետեւ իրենք անում են կեղծ, անբարո հայտարարություններ: Մեր երթի կանա՞յք են բանդիտներ, 44-օրյա պատերազմում զոհված, գերեվարված ու անհետ կորած զինվորների մայրե՞րն են բանդա: Իրական բանդաներն իրենք են, որ 2018 թվականին իրենց դըմփ-դըմփ-հուերով, դագաղներով, ծաղկեպսակներով, իրենց համասեռամոլների, աղանդավորների ջոկատ-բանդաներով եկան, իշխանությունը զավթեցին:
Մենք հայ ժողովուրդն ենք: Ցանկացած խուլիգանական, գողական բանդա ժողովրդի դեմ է: Իսկ այստեղ հայ ժողովուրդն է, ու ժողովուրդն է իրենց դեմ: Այնպես որ, ճիշտ կանեն՝ սուս ու փուս հեռանան: Այստեղ հավատավոր հայ մայրերն են, որ եկել են եկեղեցի, Աստծո մոտ՝ խնդրելու, որ թուրքերի եւ ադրբեջանցիների բոլոր պահանջները կատարող այս ավազակախումբը օր առաջ հեռանա: Մենք Հայ առաքելական եկեղեցի եկել ենք հոգու ու սրտի կանչով, այլ ոչ թե նրանց նման ի պաշտոնե, ստիպված: Մենք այստեղ եկել ենք, որ պաշտպանենք մեր հայրենիքը, որ մեր եկեղեցին չպղծվի, որ թուրքը այս եւ մեր մյուս եկեղեցիները մզկիթ չդարձնի, ինչպես անում է Շուշիում՝ Ղազանչեցոց եկեղեցու հետ:
Այսօրվա իշխանավորներից շատերի հոգեւոր մշակույթն է անհայտ, ի՞նչ կրոնի են պատկանում: Իշխանական այս կամ այն պատգամավորի, նախարարի, նախարարի ամուսնու, հարազատների կոնկրետ անուններ կան, որ այս կամ այն աղանդի ներկայացուցիչ են: Նրանք ունեն ընդհատակյա հավաքատեղիներ, ուր գնում են: Հիշում եք, թե 2018 թվականին առաջինը ում եւ ինչերի վրա հարձակվեցին՝ եկեղեցու, ընտանիքի, այն բոլոր սրբությունների վրա, որոնք հայության հիմքն են»:
Կարդացեք նաև
Աշոտ ՀԱԿՈԲՅԱՆ
