Այսօր Ֆրանսիայի հրապարակից մեկնարկել էր կանանց երթ: Որդեկորույս մայրերը պահանջում էին վարչապետ Փաշինյանին, Աննա Հակոբյանին դուրս գալ ու պատասխան տալ իրենց:
Ադրբեջանագետ Անժելա Էլիբեգովան ողջունեց արժեհամակարգ թելադրող այդ կանանց ու ասաց. «Հասկանո՞ւմ եք ինչ էներգետիկա էինք թելադրում այլ կանանց, ցույց ենք տալիս, թե հայ կնոջ տեսակն ինչպիսին պիտի լինի: Այսպիսի մայրերն են ծնում ու դաստիարակում ապագա հերոսներին»:
Կանայք Պռոշյան փողոցով երթը շարունակեցին մինչեւ Բաղրամյան պողոտա ու նստեցին խաչմերուկում՝ խափանելով երթեւեկությունը: Նրանք ներողություն էին խնդրում վարորդներից՝ ասելով. «Սա նաեւ ձեզ համար ենք անում»: Մի քանի րոպե փողոցը փակելուց եւ խաչմերուկում նստելուց հետո շարժվեցին դեպի ԱԺ շենք: Նրանք «փամփերս» էին բերել. «Հաշվի առնելով խորհրդարանի այս շենքում դիպուկահարների մոտ ծվարած 72 ՔՊ պատգամավորներին, մենք այդ հոգսն էլ ենք հոգում ու քանի որ իրենք այդքան քաջություն չունեն դուրս գալու, հաշվի առնելով իրենց սարսափը, վախը՝ դեղատնից գնել ենք «փամփերսներ»: Իրենք քանի որ սարսափում են հայ կանանցից, մեզնից հետո կարող են դուրս գալ ու վերցնել, հաստատ պետք կգա»:
Կարդացեք նաև
Կանայք «փամփերսները» փորձում էին նետել ԱԺ դարպասների արանքից ներս, ոստիկանները թույլ չէին տալիս՝ զգուշացնելով, որ այդ շենքը հատուկ պահպանվող տարածք է: Ի վերջո, մի մասը նետեցին, մյուս մասը լցրեցին ԱԺ ընդունարանի մուտքի մոտ:
Հռիփսիմե ՋԵԲԵՋՅԱՆ
