Այսօր Վանաձորում ընդդիմության հանրահավաքի ժամանակ Էդուարդ Շարմազանովը, դիմելով վանաձորցիներին, ասաց․ «Ուղիղ 104 տարի առաջ՝ մայիս ամսին Գարեգին Նժդեհի ու Բեյ-Մամիկոնյանի գլխավորությամբ ձեր պապերը ջարդ են տվել թուրքին, որ իրենց սերունդները՝ ձեր երեխաները եւ դուք ապրեք հայկական Վանաձորում եւ հայկական իշխանության օրոք, ապրեն քրիստոնեական եկեղեցու օրոք»:
Էդուարդ Շարմազանովի խոսքով, այս իշխանություններն առաջին օրից պատերազմ են հայտարարել Սուրբ եկեղեցուն, որն առաջնորդել է հայերին ե՛ւ Ավարայրում, ե՛ւ Ղարաքիլիսայում, ե՛ւ Շուշիի ազատագրման ժամանակ:
«Նրանցից մեծ թալանչի չկա, նրանք թալանել են հինգ հազար հայ տղաների կյանքը: Նիկոլ Փաշինյանի իշխանությունն այս տարիների ընթացքում մտածված մեր հայրենիքը տարել է պարտության»,-ասաց Շարմազանովը՝ վանաձորցիներին հորդորելով չվախենալ հատկապես Ալիեւի առաջ ծնկի եկած իշխանություններից:
Կարդացեք նաև
Նրա խոսքով, այսօր Վանաձորը համայնքապետ չունի. «Սրանք ընտրված համայնքապետերին կալանավորել են միայն նրա համար, որ ոնց որ Նիկոլն է ծնկի եկել Ալիեւի առաջ, Մամիկոն Ասլանյանը այդպես ծնկի չի եկել Նիկոլի առաջ»: Ապա վանկարկեց՝ «ազատություն Մամիկոն Ասլանյանին», «ազատություն բոլոր քաղբանտարկյալներին», «ամոթ Նիկոլ Փաշինյանին»:
Էդուարդ Շարմազանովն ասաց, որ իրենք ատելություն չեն բերելու:
Լուսինե ԲՈՒԴԱՂՅԱՆ
