ՀՀ ԱԺ «Հայաստան» խմբակցության պատգամավոր Գեղամ Նազարյանը Aravot.am-ի հետ զրույցում խոսեց երեկ «Մեդիա կենտրոնի» կազմակերպած «Բարեփոխված» ոստիկանությունը ձեռագիրը չի փոխում. բիրտ ուժ կիրառելու ավանդույթները շարունակվում են» թեմայով քննարկման ժամանակ բանախոսների բարձրացրած հարցերի, ինչպես նաեւ «Իմ քայլը խմբակցության» պատգամավոր Անդրանիկ Քոչարյանի՝ անհնազանդության երթերին մասնակցող երիտասարդների նկատմամբ կիրառվելիք առաջարկի մասին. «Որ մարդու իրավունքների պաշտպանությամբ զբաղվողները դատապարտում են ոստիկանության գործողությունները, շատ լավ է, որովհետեւ բիրտ ուժ ակնհայտորեն է կիրառվում, մարդկանց սահմանադրական իրավունքը ակնհայտորեն խախտվում է:
Բայց ես ավելի շատ կուզեմ անդրադառնալ այն քննարկմանը, որի ժամանակ ԱԺ պաշտպանության եւ անվտանգության մշտական հանձնաժողովի նախագահը ասաց, որ բոլոր բերման ենթարկվածների տվյալները պետք է հավաքագրվի եւ փոխանցվի պաշտպանության նախարարությանը, որպեսզի ներգրավվեն եռամսյա հավաքների մեջ:
Ստացվում է, որ Անդրանիկ Քոչարյանի համար բանակը պատժիչ օղակ է: Դա՝ բարոյական առումով: Երկրորդ կարեւոր հանգամանքը. ռազմական ոստիկանության պետի տեղակալն էլ ի պատասխան ասում է՝ այո, մենք այդ տվյալները արդեն ստացել ենք: Սա օրենքի կոպիտ խախտման, սա քրեական հանցագործության մասին խոստովանական հայտարարություն է, որովհետեւ ոստիկանությունը բերման ենթարկվածի տվյալը, որեւէ այլ մարմնի իրավունք չունի փոխանցել, առավել եւս, պաշտպանության նախարարությանը կամ ռազմական ոստիկանությանը:
Ես հիմա դատախազությանը, քննչական մարմիններին կոչ եմ անում շատ արագ արձագանքել այդ հայտարարությանը եւ միջոցներ ձեռնարկել մեղավորներին հայտնաբերելու եւ օրենքով ամենախիստ ձեւով պատժելու համար:
Կարդացեք նաև
Ես այդ գործում, անպայման, հետամուտ եմ լինելու»:
Աշոտ ՀԱԿՈԲՅԱՆ
