Այսօր ԱԺ-ում հրավիրված արտահերթ նիստում քննարկվում է մեկ հարց՝ «Տեղական ինքնակառավարման մարմնի» մասին օրենքում լրացում կատարելու նախագիծը։
Ըստ այդմ, առաջարկվում է լրացում կատարել 102-րդ հոդվածում, սահմանելով, որ 102-րդ հոդվածի 6-րդ մասով սահմանված դեպքում համայնքի ղեկավարի պաշտոնակատար նշանակելու դեպքում «Տեղական ինքնակառավարման մասին» օրենքի 19-րդ հոդվածի 1-ին մասի 2-րդ կետով սահմանված սահմանափակումը չի գործում:
Վահագն Հովակիմյան
Օրինագծի համահեղինակ ՔՊ-ական պատգամավոր Վահագն Հովակիմյանը ներկայացրեց, թե ինչ է նախատեսվում․ «6-րդ մասը նախատեսում է ֆորսմաժորային իրավիճակ, երբ խոշորացված համայնքներում ինչ-ինչ պատճառներով համայնքի ղեկավար չի ընտրվում, այս դեպքում հնարավորություն է ընձեռվում՝ վարչապետը կկարողանա համայնքի ղեկավարի ժամանակավոր պաշտոնակատար նշանակել, մինչեւ համայնքը կընտրի ղեկավարին»։
Կարդացեք նաև
Գեւորգ Պապոյանը հետաքրքրվեց՝ կա դեպք, երբ համայնքի ղեկավար կա, բայց ավագանու (ընդդիմադիր) չաշխատելու պատճառով ամբողջ համայնքը տուժում է․ «Խոսքը Թալին համայնքի մասին է։ Համայնքում կան հսկայական ծրագրեր, որոնք տեղից չեն շարժվում՝ ոչ ասֆալտապատում է լինում, ոչ այգիների հիմնում, աղբահանություն, դրա պատճառն այն է, որ ավագանին չի գալիս աշխատանքի։ Կարելի է ասել՝ մինչեւ նոր ընտրությունները, համայնքում գործը չի գնում առաջ։ Ի՞նչ լուծումներ կան»։
Հովհաննես Հարությունյան
ՏԿԵ նախարարի տեղակալ Հովհաննես Հարությունյանն ի պատասխան հարցի՝ ասաց, որ օրակարգում ներառված նախագիծն այս հարցին չի վերաբերում եւ կոչ արեց ավագանու անդամներին հավատարմ մնալ մանդատին, տեղի բնակիչներին էլ հորդորեց պարտադրել ավագանուն աշխատել, ներկա լինել նիստերին եւ կատարել պարտավորությունները։
Գագիկ Պապոյանն էլ հավելեց․ «Անկախ քաղաքական հայացքներից՝ սա անպատասխանատվություն է սեփական համայնքի եւ ժողովրդի հանդեպ, հաջորդ ընտրություններին քաղաքացիները պետք է հետեւություն անեն ու նման մարդկանց ձայն չտան։ Թալին համայնքի ավագանու ընդդիմադիր անդամների աշխատանքի չգալու պատճառով հետաձգվում են ծրագրերը։ Մեղավորը այն անպատասխանատու մարդիկ են, որոնք ձայն են ստացել ու չեն մասնակցում նիստերին։ Սա նման է մեր խորհրդարանի դեպքին: Այնտեղ, ցավոք, ընդդիմությունը մեծամասնություն է»։
Նելլի ԲԱԲԱՅԱՆ
