Այսօր ԱԺ ճեպազրույցներին մասնակցում էր միայն ՔՊ-ն: Խմբակցության քարտուղար Արթուր Հովհաննիսյանն ու պատգամավոր Վահագն Ալեքսանյանն անդրադարձան երեկվա դեպքերին, մասնավորապես, թե ինչու էին ՔՊ պատգամավորները հոտնկայս ծափահարում, վանկարկում «Հայաստան»: Հարցին՝ կարոտե՞լ էիք «Հայաստան» խմբակցության ձեր գործընկերներին՝ Ալեքսանյանը պատասխանեց. «Մենք կարոտել էինք «Հայաստան» խմբակցության դրսեւորումները, որոնցում նրանք անկեղծ են քաղաքացիների հետ ու այն դրսեւորումը, որ նրանք հերթական անգամ փախան ճշմարտությունից, բովանդակային քննարկումից: Դա շատ ազնիվ էր ու անկեղծ եւ ես կարծում եմ՝ ողջույնի ու ծափերի արժանի»:
Արթուր Հովհաննիսյանը այլ տեսակետ ուներ: Նա նախ ասաց, որ «Հայաստան» վանկարկելով՝ մեր պետության անունն են վանկարկել, ոչ թե խմբակցության. «Մենք ընդհանրապես ընդդիմությանը չենք ողջունել, չենք ողջունում ոչ մի ընդդիմության գործողություն այսքանից հետո»:
Լրագրողները հետաքրքրվեցին՝ վարչապետ Փաշինյանը ամբիոնի մոտից ասաց, որ բացահայտում պետք է անի, ըստ տարածված տեղեկատվության, խոսքը Քարագլխի բարձունքի մասին է, ի՞նչ բացահայտման մասին էր խոսքը՝ Արթուր Հովհաննիսյանը պատասխանեց, որ իսկապես, ընդդիմադիրները հենց տեսան, որ վարչապետն ունի ասելիք, այդ փաստով պայմանավորված՝ փախան դահլիճից, որովհետեւ ճշմարտությունից մշտապես փախել են. «Վարչապետն իր խոսքում նշեց, որ այդ բացահայտումը կասի՝ նայելով ընդդիմադիրների աչքերին, որպեսզի նրանք ավելի լավ հասկանան այդ ճշմարտությունը, հաշվի նստեն այդ ճշմարտության հետ: Երբ որ կգա պատեհ պահը, վարչապետը կասի իր ասելիքը ընդդիմադիրների ներկայությամբ, եթե նրանք կրկին չփախչեն»:
Կարդացեք նաև
Հռիփսիմե ՋԵԲԵՋՅԱՆ
