«Քանի որ իշխանությունում կա մեծամասնություն եւ ընդդիմություն, կարծում եմ՝ ՄԻՊ անկախությունն ավելի երաշխավորված կլինի, եթե պաշտպանն իր պաշտոնավարման ժամկետի լրանալուց հետո առնվազն 5 տարի զրկվի քաղաքական պաշտոն գրավելու հնարավորությունից։ Հակառակ դեպքում կարող է գայթակղվել եւ ընդդիմության կամ մեծամասնության կողմ դառնալ»,-ԱԺ լիագումար նիստում այսօր ՄԻՊ 2021թ․-ի տարեկան հաղորդման զեկուցումն էր ՄԻՊ Քրիստինե Գրիգորյանի կողմից, երբ նրան նման դիրքորոշման մասին հայտնեց ՔՊ խմբակցության պատգամավոր Վիգեն Խաչատրյանն ու ցանկացավ կարծիք լսել։
Քրիստինե Գրիգորյանը պատասխանեց, որ ՄԻՊ անկախության երաշխավորումը, որն ամրագրված է սահմանադրությամբ, շատ ավելի լայն է․ «Հիրավի, դա առաջնահերթ իշխող քաղաքական ուժից անկախ լինելուն է վերաբերում, բայց կոնցեպտը շատ ավելի լայն է եւ վերաբերում է որեւէ տեսակի ազդեցությունից, թիրախավորումից անկախ լինելուն, ուղղորդումներից ազատ գործելուն։ Դա լիազորությունների իրացման լավագույն երաշխիքն է։ Սահմանադրությունն այս առումով լավ երաշխիք ունի՝ վեց տարով ընտրություն։ Պաշտպանն ընտրվում է վեց տարով, որովհետեւ այդ ժամանակահատվածը չի կրկնում ընտրությունների ցիկլը։ Սա լավագույն փորձերից է, որը մեր երկրում իրացվել է սահմանադրությամբ։ Անկախության այլ երաշխիքներ եւս կան օրենքով»։
Քրիստինե Գրիգորյանի խոսքով՝ ՄԻՊ-ի՝ որեւէ պաշտոնի համար հետագա գործունեության սահմանափակում նախատեսելը պետք է լավ հիմնավորված լինի եւ չխախտի սահմանադրությամբ երաշխավորված իրավունքները։
Ապա Վիգեն Խաչատրյանը ելույթի իրավունքից օգտվելով՝ հաճոյախոսություններ շռայլեց Քրիստինե Գրիգորյանի հասցեին եւ ասաց, որ նա լավ օրինակ է՝ իր նախորդին չփնովելու, թեեւ, Խաչատրյանի խոսքով, տեղ կար փնովելու․ «Ճշմարտությունը կայանում է նրանում, որ ՄԻՊ-ը (նկատի ունի Արման Թաթոյանին․-հեղ) վերջին շրջանում քաղաքականացվել էր, որը բացասաբար է անդրադառնում ինստիտուտի վրա։ Ուստի օրենքով ՄԻՊ-ն պետք է պաշտպանել նման գայթակղությունից։ Սա ընդդիմությանն ու իշխանությանը զերծ կպահի ՄԻՊ-ն իր կողմը քաշելուց, նա չպետք է քաղաքական պատվերներ կատարի»։
Կարդացեք նաև
Հիշեցնենք, որ դեռեւս 2020թ․-ից իշխանական պատգամավորներն ու նույն թիմի բարձր պաշտոնյաներն Արման Թաթոյանի դեմ հայտարարություններով էին հանդես գալիս։
Լուիզա ՍՈՒՔԻԱՍՅԱՆ
