ՀՀ ԿԲ նախագահ Մարտին Գալստյանի տեղեկացմամբ՝Հայաստանի բանկերում մոտ 16 հազար ոչ ռեզիդենտներ բացել են նոր հաշիվներ, նրանց զգալի մասը Ռուսաստան Դաշնության ռեզիդենտներ են: Այսօր հրավիրված ասուլիսում Գալստյանն ասաց, որ աշխարհում բանկային համակարգերում ավանդաբար կան խաղի հստակ կանոններ՝ ոչ ռեզիդենտները միշտ ավելի խիստ վերահսկողության տակ են։
Ըստ ԿԲ նախագահի, Հայաստանի բանկային համակարգը ստեղծված իրավիճակում շատ ճիշտ աշխատանք է իրականացնում, պահպանվում է միջազգային բոլոր նորմերը․«Միեւնույն ժամանակ մենք տեսնում ենք, որ այդ նորմերի ներքո մենք ունենք ոչ միայն ՌԴ-ի, այլ նաեւ այլ երկրների քաղաքացիներ, որոնք բանկ մուտք գործելով եւ ապացուցելով, որ իրենց տնտեսական շահի կենտրոնը տեղափոխվում է Հայաստան, հնարավորություն են ունենում բացել հաշիվներ ՀՀ առեւտրային բանկերում, սպասարկվել ՀՀ բանկային համակարգում: Այդպիսի հաճախորդների թիվը, եթե ես չեմ սխալվում, ներկայումս մոտ 16 հազար է եւ Ռուսաստանի ռեզիդենտներն այդ նոր հաճախորդների զգալի մասն են կազմում»:
Նելլի ԲԱԲԱՅԱՆ
