Մարդու իրավունքների պաշտպան Քրիստինե Գրիգորյանն այսօր, լրագրողների հետ հանդիպման ժամանակ, անդրադառնալով երիտասարդ հղի կնոջ՝ Սոնա Մնացականյանին վրաերթի ենթարկելու միջադեպին՝ ասաց, որ ամբողջ աշխարհում պետական պաշտոնյաներին ուղեկցող ծառայությունների գործառույթը չընկալվածության հարց ունի։ Հայաստանում էլ դա որեւէ կանոնով կարգավորված չէ։
Պաշտպանը ցավ հայտնեց, որ ՀՀ վարչապետին ուղեկցող ծառայությունը, ավտովթարի ենթարկված կնոջն ընկած տեսնելով, չի կանգնում ու օգնություն չի ցուցաբերում:
Ասաց, որ դեպքի օրերին գործուղման է եղել եւ շատ խիտ գրաֆիկով հանդիպումներ է ունեցել։ Ըստ պաշտպանի, առաջին արձագանքը` որպես մարդու իրավունքների պաշտպան, եղել է այն, որ մեղավորները բացահայտվեն եւ, այդ առումով ՄԻՊ գրասենյակը նույն օրը գրություն է ուղարկել գլխավոր դատախազություն` քրգործի մանրամասներին տեղեկանալու:
«Ինձ համար, որպես մարդ, որը զբաղվել է նաեւ ոստիկանության բարեփոխումներով եւ անդրադարձել ուղեկցող ծառայության առանձնահատկություններին ֆունկցիոնալության տեսակետից, դա առնվազն նվազագույն հումանիզմ էր առաջին հերթին օգնություն ցույց տալու, հնարավորության դեպքում կնոջ ու երեխայի կյանքը փրկելու համար»,–ասաց պաշտպանը:
Կարդացեք նաև
Նրա խոսքով`ցավալի է, որ հանրության շրջանում չհարգվեց նաեւ ընտանիքի զգայունությունը, եւ, ըստ պաշտպանի, դեպքը դարձավ էժան քննարկումների թեմա։
Լուսինե ԲՈՒԴԱՂՅԱՆ
