Aravot.am-ը Մարդու իրավունքների պաշտպան Քրիստինե Գրիգորյանից հետաքրքրվեց՝ արդյոք ՄԻՊ-ը ադրբեջանական հենակետերը ՀՀ տարածքից հեռացնելու հարցը քննարկո՞ւմ է ՀՀ իշխանությունների հետ:
Հիշեցնենք, որ Մարդու իրավունքների նախկին պաշտպան Արման Թաթոյանն ապրիլի 30-ին Սարյանի պուրակում, քաղաքացիների հետ հանդիպման ժամանակ ասել էր, որ իր ղեկավարման ժամանակ ՄԻՊ-ը ապացույցներն էր ստեղծում, որպեսզի ադրբեջանցիները հեռացվեին ՀՀ գյուղերին մոտ տարածքներից, որովհետեւ միջազգային պահանջներն էին դա պարտադրում, սակայն ՀՀ իշխանությունները ասում էին՝ մենք ոչինչ չենք կարող անել:
Պաշտպանը, որն այսօր, Մամուլի ազատության համաշխարհային օրվա առիթով «Հարց ու պատասխան» ձեւաչափով հանդիպում էր կազմակերպել լրագրողների հետ, ի պատասխան ասաց. «Պաշտպանի հաստատության կողմից իրականացրած փաստահավաք առաքելության արդյունքները, այդ թվում այնպիսիք, որոնք որ հիմնավորում էին շփման գծի հատվածում անվտանգության գոտի ստեղծելու մոտեցումը, ներկայացվել են տարբեր միջազգային ատյաններին նաեւ պարոն Թաթոյանի կողմից, եւ այս մոտեցումը իր արտացոլումն է գտել Եվրոպայի խորհրդի խորհրդարանական վեհաժողովի այս տարվա հունվարին արդեն ընդունված համապատասխան բանաձեւում: Այս հաղորդակցությունը ներկայացվել է նաեւ կառավարությանը, եւ այս առումով համագործակցություն եղել է նախկինում եւ այժմ էլ կա՝ միջազգային իրավական ատյաններում կառավարության ներկայացուցչի գրասենյակի հետ»:
Քրիստինե Գրիգորյանն ասաց, որ թե՛ իր ընտրության, թե՛ պաշտոնավարման ընթացքում պաշտպանել է այս մոտեցումը եւ միջազգային շփումների ընթացքում ներկայացրել է այդ մոտեցումները՝ վկայակոչելով այդ փաստերն ու ապացույցները:
Կարդացեք նաև
Նրա խոսքով, ամենակարեւորն այն է, որ երաշխավորվի սահմանամերձ համայնքների եւ շփման գծի մոտ ապրող մարդկանց բոլոր իրավունքների իրացումը. «Ելակետը սա է, ինչ որոշում էլ կայացվի՝ կլինի միջանկյալ լուծման, հիմնական լուծման, թե սահմանազատման ու սահմանագծման, թե՛ գործընթացի ընթացքում, թե՛ արդյունքում, պիտի երաշխավորվեն այդ հատվածում ապրող մարդկանց իրավունքների անվտանգության երաշխիքները»:
Լուսինե ԲՈՒԴԱՂՅԱՆ
