Օգտագործելով շաբաթ-կիրակի օրերը, մինչ այս պահը դատախազի ցուցումը կատարված չէ եւ զոհվածների ծնողները ներգրավված չեն իբրեւ տուժողի իրավահաջորդ. Ֆրանսիայի հրապարակում այսօր հայտարարեց «Դիմադրության» շարժման անդամ, «Հայաստան» խմբակցության պատգամավոր Արթուր Ղազինյանը՝ հիշեցնելով, որ դատախազը խոստացել է կիրառել իր իրավունքը եւ եթե այսօր, մինչեւ օրվա վերջ, Հակակոռուպցիոն կոմիտեի քննիչը ցուցումը չկատարի, ապա դատախազն իր լիազորությունը կօգտագործի եւ զոհվածների ծնողներին տուժողի դատավարական կարգավիճակ կտա:
Հիշեցնենք, որ Հակակոռուպցիոն կոմիտեում 44-օրյա պատերազմի հանգամանքները քննող գործի շրջանակներում, զոհվածների ծնողները միջնորդություն էին ներկայացրել Գլխավոր դատախազություն, որ իրենց տուժողի իրավահաջորդի կարգավիճակ տրամադրվի: Նաեւ՝ Նիկոլ Փաշինյանը՝ մեղադրյալի կարգավիճակ ստանա եւ խափանման միջոց ընտրվի կալանավորումը: Այս ամենը հետեւում է ապրիլի 13-ին Նիկոլ Փաշինյանի՝ ԱԺ-ում ունեցած ելույթից: Գլխավոր դատախազությունը միջնորդություն է ներկայացրել Հակակոռուպցիոն կոմիտեին, որի շրջանակներում է քննվում գործը, բավարարել դիմումները:
Դատավարական կարգավիճակի տրամադրումը ենթադրում է, որ այդ պահից սկսած՝ հանցագործության դեպքը համարվում է հաստատված. քրեական գործն այլեւս չի կարող կարճվել, իսկ տուժողները կկարողանան վարույթ իրականացնող մարմնին պահանջներ ներկայացնել՝ դիմումների եւ միջնորդությունների ձեւով:
Արթուր Ղազինյանը հայտարարում է՝ այս գործը բացահայտվելու է եւ բոլոր մեղավորները քրեական պատասխանատվության են ենթարկվելու:
Կարդացեք նաև
Նելլի ԳՐԻԳՈՐՅԱՆ
