Ոստիկանության աշխատակիցների այսօրվա անօրինական գործողությունները, կոշտ ուժի կիրառումը վարկաբեկում են ամբողջ իրավապահ համակարգը. այսօր Ֆրանսիայի հրապարակում ասուլիսի ժամանակ ասաց «Դիմադրության» շարժման անդամ, «Հայաստան» խմբակցության պատգամավոր Արթուր Ղազինյանը։ Ոստիկանների պահվածքը, քաղաքական առումով, պատգամավորը բնութագրում է՝ «Իշխող վարչախմբի փորձ՝ ոստիկանությունը վերածել վարձկանների խմբի, որոնք հրամանով կհարձակվեն իշխանության դեմ հանդես եկող ցանկացած մարդու դեմ»: Պատգամավորն առանձնացրեց հատկապես սեւ համազգեստ կրող, եւ «անհայտ ծագման մարդկանց» եւ որոշ կարմիր բերետավորների:
Հիշեցնենք, այսօր «Դիմադրության» շարժման անդամները առավոտից փակել էին մայրաքաղաքի տարբեր փողոցներ՝ իրազեկման գործողություն իրականացնելու նպատակով: Որոշ հատվածներում բախումներ եղան ցուցարարների եւ ոստիկանների միջեւ:
Պատգամավորը հայտարարեց՝ ապօրինություն թույլ տված բոլոր ոստիկանները նույնականացված եւ իրենք հետամուտ են լինելու, որպեսզի վերջիններս պատժվեն օրենքի ողջ խստությամբ:
Արթուր Ղազինյանն ակնհայտ ապօրինի է համարում Գերասիմ Վարդանյանի ձերբակալությունը եւ նրան կրկին կալանավորելու ԱԱԾ ներկայացված նախաքննական մարմնի միջնորդությունը: Սա, ըստ բանախոսի, քաղաքական դրդապատճառով ձերբակալություն է, պայքարին խոչընդոտելու փորձ, քանի որ նա ամենաակտիվ դերակատարներից է: Նման դեպքերը, սակայն, չեն կաշկանդելու ընդդիմադիրներին. Արթուր Ղազինյանը խոստանում է՝ պայքարը հասնելու է տրամաբանական ավարտին եւ Նիկոլ Փաշինյանը հեռանալու է:
Կարդացեք նաև
Նելլի ԳՐԻԳՈՐՅԱՆ
