ՍԴ աշխատակազմի նախկին ղեկավար, դեսպան Էդգար Ղազարյանը Արցախի հսկա դրոշը Էջմիածին տանելու քայլերթի մեկնարկից առաջ լրատվամիջոցներին ասաց. «Այս գործողությունը կազմակերպվում է ընդհանուր միջոցառումների շրջանակում: Եռաբլուրը մեր փառքի պանթեոնն է, որտեղ հանգչում են Արցախի եւ Հայաստանի անկախության, ազատության համար մարտնչած մեր քաջարի տղաները: Մենք պարտավոր ենք նրանց հերոսությունը, սխրանքը սրբության պես պահել-պահպանել: Այսօր մենք կանգնած ենք այնպիսի մարտահրավերների առաջ, որ որոշումներ կայացնող քաղաքական ղեկավարությունը պարզ տեքստով հայտարարել է, որ պատրաստ է Արցախը հանձնել թշնամուն: Այսինքն, զրոյացնել, արժեզրկել այստեղ հանգչողների անձնազոհությունը, սխրանքները, քաջագործությունը: Իսկ մենք՝ ողջ մնացածներս, կարող ենք մեր գոյությունը արդարացնել միայն այն դեպքում, եթե պայքարի նրանց ուղին շարունակենք եւ նրանց ձեռքբերումները կարողանանք պահպանել:
Մենք արդեն ունեցել ենք կորուստներ, որովհետեւ Արցախի մի հատվածը իշխանության ղեկին հայտնվածների ձեռքով արդեն հանձնվել է թշնամուն: Դրա շարունակությունը թույլատրելը, ուղղակի, աններելի է:
Կարդացեք նաև
Այստեղից մենք Եռաբլուրի հաղթական ոգով գնում ենք Էջմիածին՝ տանելով Արցախի դրոշը եւ Մայր Աթոռ Սուրբ Էջմիածնից Երեւան բերելու աղոթքները, օրհնությունը, որով պետք է մեր նվիրական պայքարը հասցնենք ավարտին՝ թշնամուն վռնդենք, պահպանենք Արցախը եւ Հայաստանը»:
Աշոտ ՀԱԿՈԲՅԱՆ
