ՀՀ գլխավոր դատախազությունից առաջարկ է եղել, որ պատգամավոր Արթուր Ղազինյանը բարձրանա՝ ծնողների պահանջները քննարկելու, ծնողները մերժել են այդ առաջարկը:
Լրագրողների հետ զրույցում Արթուր Ղազինյանը կարծիք հայտնեց, որ իր կարծիքով՝ այս քրեական գործով դատախազությունը նախկինում էլ տարբեր ցուցումներ է արել, իսկ Հակակոռուպցիոն կոմիտեն սկզբունքորեն հրաժարվում է կատարել դատախազության ցուցումները:
Հիշեցնենք, զոհված զինծառայողների ծնողները ՀՀ գլխավոր դատախազության մոտ փակել են Վազգեն Սարգսյան փողոցը: Նրանք հանդիպում են պահանջում ՀՀ գլխավոր դատախազ Արթուր Դավթյանի հետ:
«Ենթադրում եմ՝ նաեւ այդ պատճառով է քննիչ փոխվել: Փոխվել է քննիչը. առաջ ուրիշ քննիչ էր, հիմա է ուրիշ»,- ասաց Արթուր Ղազինյանը՝ հավելելով, որ այդ գործը մեկ քննիչի գործ չէ, քննչական խումբ պետք է աշխատի:
Կարդացեք նաև
Հակակոռուպցիոն կոմիտեն Արթուր Ղազինյանը համարում է «քաղաքական աֆիլացված կառույց», իսկ կոմիտեի ղեկավար Սասուն Խաչատրյանի անաչառ լինելու մասին նա իլյուզիաներ չունի. «Ինքն ասում է՝ ով այս իշխանության դեմ է, մեր թշնամին է: Իր գործն է՝ բոլոր ընդդիմադիրներին պատժելը, կալանավորելը, ձերբակալելը»: Արթուր Ղազինյանը թերահավատ է, որ Հակակոռուպցիոն կոմիտեն քայլեր կանի այս գործով:
Ի դեպ, կոմիտեում ծնողներին փոխանցել են, որ գլխավոր դատախազը բանավոր ցուցում է տվել, ինչը հիմք չէ, գրավոր ցուցում է անհրաժեշտ: Արթուր Ղազինյանը հստակեցնում է՝ Արթուր Դավթյանը գրավոր ցուցում է տվել. «Դատախազը 14.10-15-ին իջնում է, ցույց է տալիս, որ էլեկտրոնային փոստով ցուցումն ուղարկվել է քննիչին, քննիչն ասում է՝ ցուցումը իրենք չեն ստացել: 10 րոպե հետո, իրենք խոսում են քննիչի հետ, քննիչը հաստատում է, որ ստացել է այդ ցուցումը՝ առավոտյան գնացեք՝ կարգավիճակը ստացեք: Դատախազությունը պետք է հետամուտ լինի: Հիմա որ դատախազը կիջնի՝ կասենք»:
Ավելի ուշ, ծնողները համաձայնեցին, որ փաստաբան Վահան Հովհաննիսյանը գնա գլխավոր դատախազի հետ հանդիպման:
Նելլի ԳՐԻԳՈՐՅԱՆ
