ԵԽԽՎ-ում հայկական պատվիրակության անդամ Արուսյակ Ջուլհակյանն իր ելույթում մասնավորապես նշել է. «Հարգելի՛ գործընկերներ, ժողովրդավարությունն անսակարկելի արժեք է: Եւ պատահական չէ, որ Եվրոպայի խորհրդի ստեղծման նպատակը եւ հիմքը եղել է ժողովրդավարության, մարդու իրավունքների եւ իրավունքի գերակայության ապահովումը: Ցավոք, ժողովրդավարությունն ամբողջ աշխարհում դժվար ժամանակներ է ապրում, եւ մենք պետք է մեկտեղենք մեր ջանքերը ժողովրդավարությունը պաշտպանելու համար:
Զեկուցողը ճիշտ է, երբ ասում է, որ մենք իրական ժողովրդավարությունը պետք է տարբերենք իմիտացիոն ժողովրդավարությունից, քանզի իրական ժողովրդավարությունը ենթադրում է ոչ միայն մեծամասնության իշխանություն, այլ նաեւ հնարավորություն ապահովելու նաեւ քաղաքական փոքրամասնության իրավունքները, երաշխավորելու իրավունքի գերակայության ապահովումը: Չափազանց կարեւոր է նաեւ իշխանությունների տարանջատման ապահովումը:
Շատ դեպքերում մենք, ցավոք, բախվում ենք իրավիճակների հետ, երբ ավտորիտար ռեժիմները փորձում են ժողովրդավարության իմիտացիա անել՝ դրանով ստվեր նետելով իրական ժողովրդավարության բովանդակության վրա:
Գործընկերնե՛ր, կարեւոր է նշել, որ ժողովրդավարությունն ունի ոչ միայն ներքին, այլ նաեւ արտաքին համատեքստ: Եւ պետություններն արտաքին հարաբերություններում պետք է լինեն նույնքան ժողովրդավար, որքան ժողովրդավար են ներպետական հարցերում: Պետությունը չի կարող ունենալ ներքին ժողովրդավարություն, բայց միաժամանակ լինել հակաժողովրդավարական արտաքին հարցերում:
Կարդացեք նաև
Միայն իրական ժողովրդավարությունն է ունակ երաշխավորելու ժողովրդավարական անվտանգություն եւ հասնելու խաղաղության ընդհանուր նպատակին՝ հիմնվելով արդարության եւ միջազգային համագործակցության վրա:
Ավտորիտար առաջնորդները, հակառակը, օգտագործում են հակամարտություններն իշխանություն զավթելու, իշխանություն պահելու համար: Այդ պատճառով ժողովրդավարության համար շատ բարդ է բանակցել խաղաղության շուրջ ավտորիտար առաջնորդի հետ:
Գործընկերնե՛ր, պատերազմը ժողովրդավարության թշնամին է:
Լեռնային Ղարաբաղի 2020թ. պատերազմից հետո Հայաստանում հանրային քննարկում սկսվեց: Փորձ էր արվում մտայնություն ձեւավորել, որ ժողովրդավարությունն ու անվտանգությունն իրար հակոտնյա են, եւ հնարավոր չէ հզոր երկիր լինել՝ լինելով ժողովրդավար: Ինչեւէ, արտահերթ խորհրդարանական ընտրությունները ցույց տվեցին, որ հայ ժողովուրդը բավականին իմաստուն էր՝ հասկանալու համար, որ ժողովրդավարությունը եւ անվտանգությունը, ժողովրդավարությունը եւ հզոր լինելը հակասում են իրար: Այս հասկացությունները փոխկապակցված են, եւ հնարավոր չէ լինել առողջ եւ ուժեղ բնակչություն ունեցող հզոր երկիր՝ առանց ժողովրդավարության:
Գործընկերնե՛ր, ինչպես արդեն նշեցի, միայն ժողովրդավարությունն է ունակ բերել իրական խաղաղություն, քանզի ժողովրդավարական երկրները միմյանց հետ չեն պատերազմում:
Հետեւաբար, իմ համոզմունքն է, որ մենք պետք է այս հարթակն օգտագործենք մեր ժողովրդավարական ուղիների վերաբերյալ փորձի փոխանակում անելու համար: Մենք պետք է մեկտեղենք մեր ջանքերը պաշտպանելու ժողովրդավարությունը մեր երկրներում, ինչն էլ, իր հերթին, կնպաստի խաղաղությանը տարածաշրջանում: Ինչեւէ, այս ջանքերում ավելի լավ արդյունք գրանցելու համար առաջարկում եմ նախ եւ առաջ հավաստիանալ, որ բոլորս միանման ենք ընկալում այն արժեքները, որոնք ընկած են Եվրոպայի խորհրդի ստեղծման հիմքում»:
ԱԺ
