Զոհված զինծառայողների ծնողները ՀՀ գլխավոր դատախազության մոտ փակել են Վազգեն Սարգսյան փողոցը: Նրանք հանդիպում են պահանջում ՀՀ գլխավոր դատախազ Արթուր Դավթյանի հետ:
Հիշեցնենք, զոհվածների հարազատները երրորդ օրն է` Գլխավոր դատախազության մոտ են ցույց անում: Նրանք պահանջում են, որ Հակակոռուպցիան կոմիտեում քննվող 44-օրյա պատերազմի հանգամանքները քննող քրեական գործի շրջանակներում՝ զոհվածները տուժողի կարգավիճակ ստանան, իսկ նրանց հարազատները՝ տուժողի իրավահաջորդի: Նաեւ՝ Նիկոլ Փաշինյանը՝ մեղադրյալի կարգավիճակ ստանա եւ խափանման միջոց ընտրվի կալանավորումը: Այս ամենը հետեւում է ապրիլի 13-ին Նիկոլ Փաշինյանի՝ ԱԺ-ում ունեցած ելույթից, որտեղ նա հայտարարել էր. «Այո՛, պատերազմը հնարավոր էր կանխել, արդյունքում կլիներ նույն իրավիճակը, սակայն առանց զոհերի»: Գլխավոր դատախազությունը միջնորդություն է ներկայացրել Հակակոռուպցիոն կոմիտեին, որի շրջանակներում է քննվում գործը, բավարարել դիմումները: Սահմանված կարգի համաձայն՝ դիմումները պետք է քննվեն հնգօրյա ժամկետում, ծնողները պահանջում են, որ անհապաղ քննություն իրականացվի: Ծնողներն այսօր նույն պահանջը ներկայացնում էին Սասուն Խաչատրյանին։
Հակակոռուպցիոն կոմիտեում ծնողներին ասել են, որ չեն ստացել դատախազության միջնորդությունը: Մինչդեռ, երեկ, տարբեր լրատվամիջոցների հարցերին ի պատասխան, կոմիտեում ասել էին, որ ստացել են դատախազության միջնորդությունը: Այս ամենում ծնողները ձգձգման միտում են տեսնում:
Զոհվածների ծնողները սպառնում են ծայրահեղ միջոցների դիմել, եթե իրենց պահանջն արդար լուծում չստանա: «Եթե մենք դուրս եկանք, ձեզ տանկն էլ չի փրկելու»,- ասաց «Ցոր» զորամասում զոհված զինծառայողներից մեկի ծնողը: Նա Մեղրիից է եկել Երեւան՝ ցույցերին մասնակցելու: «Օրենք են պահում. Ի՞նչ օրենք, օրենքով, հիմա բոլորը պիտի փակված լինեին՝ Նիկոլից բռնած»,- ասաց նա:
Կարդացեք նաև
Դատախազության շենքի մոտ աննախադեպ քանակի ոստիկանական ուժեր են կենտրոնացվել: Դա ավելի զայրացրեց զոհվածների ծնողներին. Ժամանակ առ ժամանակ նրանք վրդովմունքով դիմում են ոստիկաններին՝ մեղադրելով, որ պաշտպանում են «ագենտներին, դավաճաններին»՝ հանցակից դառնալով նրան: Նույն մեղադրանքները հնչում են գլխավոր դատախազ Արթուր Դավթյանի վերաբերյալ:
«Մեր պետության դեմքը սա է՝ զոհված զինծառայողների ծնողների դեմ սպեցնազ են բերել»,- ասաց ծնողներից մեկը:
Ցուցարարները դիմում են զոհվածների ծնողներին, որպեսզի չհամակերպվեն իրենց զավակների մահվան հետ, միանան իրենց եւ պայքարեն իրենց երեխաներին սպանողներին արժանի պատժի արժանացնելու համար:
Նելլի ԳՐԻԳՈՐՅԱՆ
