Երեկ՝ ապրիլի 28-ին, Երևանում, «Դիզակ Արտ» մշակութային երիտասարդական կենտրոնի նախաձեռնությամբ կայացել է 20-րդ դարի Արցախի լավագույն մանկավարժ, ԼՂՀ վաստակավոր մանկավարժ, բազմաթիվ հրապարակախոսական և պատմաաշխարհագրական ակնարկների հեղինակ, Արցախի Հադրութի շրջանի Տումի գյուղից նշանավոր մտավորական Խորեն Ղազարյանի «Տումի» գրքի շնորհանդեսը, որը 2005 թվականին արժանացել է ԼՂՀ կառավարության Եղիշեի անվան ամենամյա մրցանակի։ Սա գրքի երկրորդ վերահրատարակությունն է: Խորեն Ղազարյանը հեղինակել է նաև «Աղբուլաղ-Ակնաղբյուր» գիրքը:
Գրքի նմուշօրինակները, որոնք Խորեն Ղազարյանն էր նվիրել համագյուղացիներին, 44-օրյա պատերազմի ժամանակ մնացել են գյուղում: Վերահրատարակման գաղափարը ոգևորել է ոչ միայն հարազատներին, այլև տումեցիներին:
«Պապիկի ծնունդն է, նա կդառնար 94 տարեկան: Ցավոք գերեզման չենք կարող այցելել: Որոշել ենք այսկերպ շնորհավորել նրա երկնային ծնունդը»,-Aravot.am-ի հետ զրույցում ասացին հարազատները:
Կարդացեք նաև
Շնորհանդեսին ելույթ ունեցան Խորեն Ղազարյանի հարազատները: Զինա Գասյանը նկատեց՝ հայտնի մանկավարժները պատմության մեջ թողել են աշակերտի նկատմամբ իրենց սիրո անմար կրակը և Խորեն Ղազարյանն աշխարհ է եկել իրենից հետո հետագիծ թողնելու համար:
«Տումին իր հարազատներից բաժանված, աչքը նրանց վերադարձին, օկուպացված և գերության մեջ հայտնված Հադրութի գյուղերից մեկն է, որի աշխատասեր ու հայրենասեր բնակիչները ոչ իրենց կամքով թողեցին հայրենի օջախները, տարիների վաստակը, եկան և ապաստան գտան մայր հայրենիքում՝ Հայաստանում: «Տումի» գիրքն էլ մի ապտակ է ադրբեջանցի այն գիտնականներին, որոնք ձգտում են աշխարհին ապացուցել, որ, իբր, Մենուայի, Արգիշտիի Հայաստանը, Տիգրան Մեծի ծովից ծով Հայաստանն իրենցն է: Ծիծաղելի է, չէ՞»,-նշել է Խորեն Ղազարյանի կինը՝ Էմմա Սարդարյանը, ավելացնելով, որ գրքի հեղինակի նպատակներից մեկն էլ ցույց տալն է, որ Տումին բնիկ հայկական է:
Միջոցառումը համեմված էր «Դիզակ Արտ»-ի սաների, ինչպես նաև Անուշ Ստեփանյանի և Մհեր Մոսյանի երաժշտական կատարումներով:
Վովա ԱՐԶՈՒՄԱՆՅԱՆ
Լուսանկարները՝ Զոհրաբ ԸՌՔՈՅԱՆԻ
