Այսօր «Հայրենիք» կուսակցության նախագահ Արթուր Վանեցյանի գլխավորած երթի ավարտին, երբ վերադառնում էին Ազատության հրապարակ, հանկարծ Հյուսիսային պողոտայի հատվածում ծեծկռտուք սկսվեց ցուցարարների ու ոստիկանների միջեւ: Հայհոյանքներ, հրմշտոց ու քաշքշուկ էր, գոռում էին՝ «մի՛ խփի, արա, սաղդ հե՛տ գնացեք»:
Վանեցյանը հայտարարեց. «Ժողովուրդ, հանգիստ: Չենք տրվում սադրանքների: Որեւէ մեկը ոստիկանների հետ չի ընդհարվում: Ոստիկաննե՛ր, պահեք ձեզ ձեր լիազորությունների շրջանակներում»:
Կարդացեք նաև
Նա հորդորեց ցուցարարներին Ազատության հրապարակ գնալ: Լրագրողների հետ զրույցում Վանեցյանն այսպես մեկնաբանեց կատարվածը. «Ինձ ասացին, որ ոստիկանները հարվածել են քաղաքացու՝ անտեղի: Դուք տեսաք, որ խաղաղ երթ էր, որեւէ բան չկար ու ինձ ասեցին՝ հարվածել են ինչ-որ քաղաքացու ու սկսեց այդ քաշքշուկը: Գիտեք դա արդեն ինչի է նմանվում՝ իշխանությունը հոգեվարքի մեջ է, վերջին ճիգերն են գործադրում, փորձելու են ճնշեն ժողովրդին: Չեն կարողանալու, ինչքան իրենց այդպես պահեն, այնքան շուտ է իրենց վերջը գալու: Որպես գեներալ, որպես ուսադիր կրող մարդ եւս մեկ անգամ հորդորում եմ բոլոր ուժայիններին դուրս չգալ իրենց լիազորություններից, ծառայել օրենքին, ոչ թե անձերի ու խմբակների»:
Վանեցյանը տեղյակ չէր՝ բերման ենթարկվածներ կա՞ն, թե՞ չէ. «Ուղղակի գիտեմ, որ ոստիկաններից մեկը հարվածել է մեր տղաներից մեկին, չգիտեմ հստակ ում է հարվածել, ինչի է հարվածել»:
Հռիփսիմե ՋԵԲԵՋՅԱՆ
