Հնդկաստանում շատ հետաքրքրված են Հայաստանի տեղեկատվական տեխնոլոգիաների ոլորտով, մասնավորապես՝ դպրոցական ՏՏ ծրագրերով, դպրոցներում ինժեներական լաբորատորիաներով: Հնդկաստան կատարած այցից հետո այսօր այս մասին ասաց ՀՀ աշխատանքի եւ սոցիալական հարցերի նախարար Նարեկ Մկրտչյանը՝ նշելով, որ պատրաստակամ են հայկական փորձն «արտահանել» Հնդկաստան:
«Արմենպրես»-ի մամուլի սրահում նախարարը ներկայացրեց, թե այդ երկրից ինչ արդյունքներով են վերադարձել: Ասաց, որ նախքան մեկնելը՝ Հնդկաստանը հաշմանդամություն ունեցող մեր քաղաքացիների պրոթեզավորմանն աջակցելու պատրաստակամություն էր հայտնել: Արդեն Հնդկաստանում Նարեկ Մկրտչյանն այցելել է պրոթեզների արտադրությամբ զբաղվող գործարան՝ ծանոթանալու՝ ինչ կարգի պրոթեզներ են արտադրվում: Նրա խոսքով, Հնդկաստանում, որտեղ պրոթեզների կարիք ունեցող քաղաքացիները անհամեմատ շատ են, դրանք մարդկանց բաժանվում են անվճար, տեղում գնահատվում է կարիքը եւ տրամադրվում:
Ըստ նախարարի, Հայաստանում արտադրվում են պրոթեզներին աջակցող միջոցներ, որոնցով էլ հետաքրքրված է հնդկական կողմը եւ հնարավոր է այդ միջոցներն արտահանվեն Հնդկաստան:
Այցի ժամանակ պայմանավորվել են շախմատը զարգացնել նաեւ մեր խնամքի կենտրոններում, որտեղ տեսողության խնդիրներով երեխաներ ու մեծահասակներ են ապրում: Հայկական կողմը կստեղծի շախմատի խմբակներ, Հնդկաստանի մասնագետներն էլ կաջակցեն կրթական ծրագրերով ու ուսուցիչների վերապատրաստմամբ:
Կարդացեք նաև
Այցի ժամանակ նաեւ պայմանավորվածություն է ձեռք բերվել Հայաստանում կազմակերպել միջազգային գիտաժողով՝ նոր տեխնոլոգիաների, արհեստական բանականության ու աշխատանքի ապագայի թեմաներով:
Նախարարն ասաց, որ Հնդկաստանում հանդիպել են նաեւ մեծ կորպորացիայի պատասխանատուներին, որոնք զբաղված են մարդկանց հմտությունների զարգացմամբ, վերապատրաստմամբ, որը համագործակցում է տարբեր ասոցիացիաների, տնտեսությունում բիզնես գործունեություն ծավալող ընկերությունների հետ: Այդ ընկերությունը Հնդկաստանում տարեկան վերապատրաստում է 60 միլիոն մարդու եւ ուղղորդում է տարբեր ոլորտներ:
Նախարարի խոսքով, ներկայումս Հայաստանն իր զբաղվածության ծրագրերը կանգնեցրել է եւ վերագնահատում է՝ փորձելով ավելի արդյունավետ ու թիրախային դարձնել եւ այդ առումով հնդկական փորձը բավականին առաջադեմ է:
«Եթե մեզ հաջողվեց նմանատիպ համակարգ ներդնել, շատ կարճ ժամանակահատվածում մենք կկարողանանք լայնածավալ վերապատրաստումներ եւ հմտությունների զարգացման նոր ճանապարհներ առաջարկել մեր քաղաքացիներին»: Ասաց, որ ստորագրվել է հուշագիր՝ Հայաստանում նման ինստիտուտ ներդնելու:
Նարեկ Մկրտչյանի խոսքով, համագործակցում են պաշտպանության նախարարության հետ եւ զորացրումից մեկ-երկու ամիս առաջ կգնահատեն բոլոր զինծառայողների կարիքները՝ հասկանալու՝ ինչ կրթություն ունեն, զորացրվելուց հետո ինչ ցանկություններ ունեն, ինչ հմտությունների կուզեին տիրապետել եւ այլն: Ըստ նախարարի, արդեն զորացրվելուց հետո միասնական սոցիալական տարածքային կենտրոններից նրանց հետ կապ կհաստատեն եւ կառաջարկեն զբաղվածության ծրագրեր, կուղղորդեն վերապատրաստումների:
Թե երբվանից գործնական քայլեր կկատարվեն, նախարարն ասաց, որ նախ՝ պետք է ուսումնասիրվեն երկու երկրների օրենսդրությունները, ապա կստեղծվեն աշխատանքային խմբեր:
Լուսինե ԲՈՒԴԱՂՅԱՆ
