Կառավարությունն այսօրվա նիստում հաստատեց ուսուցիչների կամավոր ատեստավորման արդյունքով ուսուցչի դրույքաչափը՝ 200 հազար դրամ։ Այսօր կառավարության նիստից հետո լրագրողների հետ ճեպազրույցում ԿԳՄՍ նախարար Վահրամ Դումանյանն ասաց, որ մայիսի մեկից կամավոր ատեստավորում ունեցած ուսուցիչների դրույքաչափը կընդունվի 200 հազար, մինչ այս՝ 108 հազար էր։
«Մեր նպատակն է խրախուսել, որպեսզի ուսուցիչները, մանկավարժական կազմն իրենց մասնագիտական որակները կատարելագործեն, եւ մեր երեխաներն ունենան բարձր որակներով ուսուցիչներ»,-ասաց նախարարը։
Նրա ներկայացմամբ՝ տեսականորեն, բոլոր ուսուցիչներն ունեն հնարավորություն իրենք իրենց աշխատավարձը բարձրացնեն․ «Ոչ թե նստեն, ոչինչ չանեն ու ասեն՝ կառավարություն, դուք մեր աշխատավարձը բարձրացրեք, ես ոչինչ չեմ ուզում անել։ Հիմա կառավարությունը տվել է հնարավորություն, ակնկալում ենք ակտիվություն։ Հնարավորություն կա մինչեւ 400 հազար դրամ բարձրացնել աշխատավարձը»։
Դումանյանի խոսքով՝ այս ծրագրի համար, ըստ կանխատեսումների, մինչեւ 2025 թվականը պետական բյուջեից հատկացվելու է մոտ 33 մլրդ դրամ՝ մոտ 34 հազար մանկավարժական կազմի համար, իսկ օրինակ 2024-ին՝ 18 մլրդ դրամ։
Կարդացեք նաև
Նելլի ԲԱԲԱՅԱՆ
