Երեկ տեղեկություն էր տարածվել, որ Ազատության պողոտայում բողոքի ցույցի ժամանակ ոստիկանները կոտրել են ԱԺ նախկին պատգամավոր Արագած Ախոյանի որդու ավտոմեքենայի դիմապակին:
Ինքը՝ Արագած Ախոյանը, կատարվածի մասին Aravot.am-ին պատմեց հետեւյալը. «Ազատության պողոտայում, «Ռեդիսոն» հյուրանոցի առջեւ անհնազանդության ակցիա էր, որին մասնակցում էինք բոլորս: Ագրեսիա չկար, սակայն ոստիկանությունը անհասկանալի կերպով սկսեց ուժ կիրառել: Ակցիայի մասնակիցները կանգնեցին ու քաշքշուկ սկսվեց: Այդ պահին հայտնվեց տղայիս մեքենան: Երեւի եկել էր իմ հետեւից, բայց չհասցրեց: Մեքենայի առջեւ մարդիկ կային նստած: Ոստիկանները դիմեցին, որդուս՝ «քշի, արա, քշի, արա»: Բայց ինչպե՞ս, ո՞ւր քշեր մարդկանց վրա: Մի պահ կանգնեց ու այդ պահին մոտ վեց կարմիր գլխարկավոր հարձակվեցին ու սկսեցին հարվածել մեքենային ու դիմապակին կոտրեցին: Ասես, ժողովրդի մուռը հենց մեքենայից էին հանում: Դեմքերը ֆիքսված են ու պատասխանատվության պետք է ենթարկվեն: Կատարվածի առիթով կյանքումս առաջին անգամ հանցագործության մասին հաղորդում եմ տվել:
Հետո ինձ բերման ենթարկեցին ոստիկանության Արաբկիրի բաժին: Ավելի ուշ այնտեղից իմ վրա մեկ այլ գործով՝ իբր, բռնության կոչեր եմ հնչեցրել, գնացի Կենտրոն բաժին, որտեղ ինձ սպասում էին:
Վերջերս նկատել եմ, որ ոստիկանության վերաբերմունքը կոշտացել է, հավանաբար, հրամանով: Նախկինում էլ բողոքի ակցիաներ արել ենք ու երբեք այսպիսի վերաբերմունք չի եղել: Բայց հաջողության չեն հասնելու: Մենք էլ մեր անելիքը գիտենք»:
Կարդացեք նաև
Աշոտ ՀԱԿՈԲՅԱՆ
