ԱԺ «Քաղաքացիական պայմանագիր» խմբակցության պատգամավոր Վլադիմիր Վարդանյանը ԵԽԽՎ-ում անդրադարձել է Թուրքիայի ԱԳ նախարար Մեւլութ Չավուշօղլուի կողմից «Գորշ գայլերի» նշանի ցուցադրությանը եւ դատապարտող ելույթ է ունեցել:
«Ես կցանկանայի ձեզ մի բան ցույց տալ: Սա, այսպես կոչված, «Գորշ գայլեր» արմատական ահաբեկչական կազմակերպության նշանն է, որը պատասխանատու է մի շարք ահաբեկչական հարձակումների եւ հանցագործությունների համար, որոնք իրականացվել են հայերի, քրդերի, այլ փոքրամասնությունների դեմ: Դուք կարող եք հարցնել՝ ինչո՞ւ եմ ցույց տալիս այս նշանը եւ ի՞նչ փոխկապակցվածություն կա իմ ելույթի եւ զեկույցի միջեւ: Ո՛չ, հարգելի՛ գործընկերներ, ես չեմ շեղվում քննարկումից: Ես դա ձեզ ցույց եմ տալիս, քանի որ ընդամենը երկու օր առաջ Թուրքիայի գործող արտգործնախարար պարոն Մեւլութ Չավուշօղլուն դա ցույց է տվել Ուրուգվայում Հայոց ցեղասպանության ճանաչման պահանջով խաղաղ ցույցի մասնակիցներին:
Տարօրինակ է, որ բարձր մակարդակի եվրոպացի դիվանագետն ու քաղաքական գործիչը նման նշան է քարոզում: Ավելի անընդունելի է դառնում, երբ դա անում է Խորհրդարանական վեհաժողովի նախկին նախագահը, մի մարդ, ով այստեղ խոսում էր ժողովրդավարության, մարդու իրավունքների եւ օրենքի գերակայության մասին: Այն մարդը, ում բոլորս աջակցություն ու իրավունք ենք տվել մեզ բոլորիս ներկայացնելու եւ Եվրոպայի խորհրդի գաղափարները տարածելու, եվրոպական արժեքները պաշտպանելու, իրեն թույլ է տալիս առաջ մղել նման արմատական խորհրդանիշ: Հարկ է նաեւ նշել, որ նման գործողությունները վտանգում են երկու հասարակությունների միջեւ վստահության հնարավոր ձեւավորման գործընթացը: Այստեղ ես ուզում եմ եւս մեկ անգամ հստակ նշել, որ մենք Հայաստանում շատ նվիրված ենք եվրոպական արժեքներին եւ շարունակում ենք անել հնարավորը հայ-թուրքական հարաբերությունների կարգավորման համար՝ հույս հայտնելով, որ մեր թուրք գործընկերները բավարար կամք կունենան բացելու սահմանը եւ նորմալ հարաբերություններ հաստատելու Հայաստանի հետ, նպաստելու մեր տարածաշրջանում դեէսկալացիային ու կայուն խաղաղության հաստատմանը»,-ասել է Վլադիմիր Վարդանյանը:
Կարդացեք նաև
ՀՀ ազգային ժողով
