ՀՅԴ Հայաստանի երիտասարդական միությունը եւ համակիրներն այսօր կառավարության դիմաց էին եկել՝ կարմիր ներկով լի դույլով։ Երիտասարդների ձեռքին նաեւ «արյունոտ» ձեռքերով պաստառ կար։ ԱԺ «Հայաստան» խմբակցության պատգամավորներ Քրիստինե Վարդանյանը եւ Թադեւոս Ավետիսյանը հայտարարեցին, որ խաղաղ ցույց են իրականացնում, իսկ կարմիր ներկը խորհրդանշում է կառավարության շենքում նստած մեկ անձի արյան ծարավը։
«Որտեղ գնում են, այնտեղ արյուն է, նրանց ձեռքերն արյունոտ են, եւ դա մեր արյունն է։ Երեկ մեքենայի անիվների տակ հայտնված կինը կարող էր լինել յուրաքանչյուրիս կինը կամ քույրը, դուստրը․․․Ո՞նց է ստացվում, որ ԱԺ ներխուժած երիտասարդին հանկարծ մահացած են գտնում, կամ ԱԱԾ պետն ինքնասպան է լինում, կամ զոհված հերոսների մարմինները պահվում են անմխիթար պայմաններում»,-ասաց Քրիստինե Վարդանյանը։
Նրա ելույթն ընդհատվեց, քանի որ մոտեցած կարմիր բերետավորները հորդորեցին դույլը հեռացնել հասարակական վայրից։ Ի պատասխան պատգամավոր Թադեւոս Ավետիսյանն ասաց, որ ինքն իրավունք ունի ձեռքերը մտցնել դույլի մեջ։ Այն բանից հետո, երբ պատգամավորը ձեռքերը դուրս բերեց դույլից եւ նետվեց հատակին՝ կարմիր հետքեր թողնելով, վայրկյանների ընթացքում ոստիկանները վրա հասան, դույլը թափվեց, քաշքշուկ եղավ։
Ոստիկանները Թադեւոս Ավետիսյանին «օդի մեջ»՝ ձեռքերից ու ոտքերից բռնած, տարան ոստիկանական մեքենան։ Ավետիսյանը, սակայն, իր գործն արդեն ավարտին էր հասցրել․ հատակին մի քանի զույգ կարմիր ձեռքեր էին մնացել։
Կարդացեք նաև
«Նիկոլ՝ մարդասպան, հայասպան»,-բղավեցին ցուցարարները՝ վերադառնալով կառավարության դիմաց։
Ուշագրավ է, որ Քրիստինե Վարդանյանից մի քանի քայլ այն կողմ հանգիստ կանգնած էր մի երիտասարդ, որի վրա հանկարծակի «հարձակվեցին» ոստիկաններն ու քաշքշելով տարան մի կողմ, հետը՝ մեկ այլ տղայի։ Երիտասարդին հաջողվեց դուրս պրծնել ոստիկանների ձեռքից, իսկ ահա մյուսին նրանք մի քանի հոգով տապալել էին գետնին։
Ավելի ուշ պատգամավոր Թադեւոս Ավետիսյանը վերադարձավ ցուցարարների շարքերը ու հայտարարեց․ «Սա եք դուք՝ դուք ամենուր մահ եք բերում»։
Լրագրողների հետ զրույցում Քրիստինե Վարդանյանը հայտարարեց՝ նման մեթոդներով իրենց չեն կանգնեցնի, մեկին բերման ենթարկեն՝ տեղը եւս տասը կգան։
Հիշեցնենք, որ երեկ պատերազմում անմահացածների ծնողներն «արյունոտ» շապիկներ էին դրել կառավարության դիմաց։
Լուիզա ՍՈՒՔԻԱՍՅԱՆ
