Այսօր, ՀՀ գլխավոր դատախազության շենքի մոտ, փաստաբանները՝ 44-օրյա պատերազմում զոհվածներ ծնողների հետ, գլխավոր դատախազությանը հանձնեցին պահանջ՝ պետական դավաճանության քրեական գործում Նիկոլ Փաշինյանին որպես մեղադրյալ ներգրավվելու մասին:
«Զարթոնք» կուսակցության նախագահ, իրավաբան Արա Զոհրաբյանը ներկայացրեց հիմքերը, որոնք 12 կետից են բաղկացած եւ հիմնված են այս ընթացքում Նիկոլ Փաշինյանի կողմից արված տարբեր հայտարարությունների վրա:
Հիշեցնենք, դեռ 2020 թվականի դեկտեմբերի 22-ին, 400-ից ավելի փաստաբաններ, հանցագործության մասին հաղորդում են ներկայացրել գլխավոր դատախազին՝ պետական դավաճանության հատկանիշներով քրեական գործ հարուցելու համար: Հաղորդումը ուղղորդվել էր ՀՔԾ: 2021 թվականի սեպտեմբեր ամսին միայն քրեական գործ հարուցվեց: Արա Զոհրաբյանը հայտարարեց, որ այդ քրեական գործով առ այսօր ոչինչ հայտնի չէ, ավելին, այս ընթացքում, ի վնաս մեր պետականության, բազմաթիվ ջրեր են հոսել:
Կարդացեք նաև
Հիշեցնենք նաեւ, որ 44-օրյա պատերազմում զոհվածների հարազատներն այսօր, Շառլ Ազնավուրի հրապարակից շարժվեցին դեպի Գլխավոր դատախազության շենք, նրանք պահանջում են, որպեսզի 44-օրյա պատերազմի հանգամանքները քննող գործի շրջանակներում տուժողի կարգավիճակ ստանան, իսկ Նիկոլ Փաշինյանը՝ մեղադրյալի եւ խափանման միջոց ընտրվի կալանավորումը:
Զոհված զինծառայողների ծնողները պահանջում էին, որպեսզի Արթուր Դավթյանը իջնի իրենց մոտ եւ պատասխանի իրենց հարցերին: Գլխավոր դատախազի արարողակարգի վարչությունից ծնողներին տեղեկացրեցին, որ դատախազը կընդունի նրանց հինգ հոգանոց պատվիրակությանը:
«Չենք խնդրում քեզ, պահանջում ենք, իջիր»,- եղավ ծնողների պատասխանը:
«Նստածդ շենքում հայրենիքիդ դրոշը տեսել ե՞ս, տեսել ե՞ս հայրենիքիդ դրոշի գույնը»,- դիմելով գլխավոր դատախազին՝ ասաց զոհված Մխիթար Գալեյանի հայրը: Դրոշը գունաթափված եւ մաշված էր:
Ավելի ուշ, Արթուր Դավթյանի հետ ծնողների կիսատ մնացած խոսակցությունից հետո, «Հայաստան» խմբակցության պատգամավոր Արթուր Ղազինյանը տեղեկացրեց, որ Նիկոլ Փաշինյանին մեղադրյալ ներգրավվելու մասին դիմումը փոխանցվել է գլխավոր դատախազություն:
Նելլի ԳՐԻԳՈՐՅԱՆ
