Aravot.am-ի տեղեկություններով, Գյումրու Ղանդիլյան փողոցի սեփական տներից մեկում տեղի ունեցած դանակահարության փաստով կա կասկածյալ։ Նա Գյումրիի բնակիչ, 22 տարեկան Հ․Պ-ն է, դանակահարված տանտիրուհու ազգականը։
Ինչպես ավելի վաղ հայտնել էինք, նույն հասցեից միաժամանակ Գյումրի բժշկական կենտրոն էին տեղափոխել երկու քաղաքացիների․ 1973 թվականին ծնված մի կնոջ՝ «ձախ ազդրի կտրած-ծակած վերք և որովայնի առաջային մակերեսի կտրած-ծակած վերքեր» և 1984 թվականին ծնված տղամարդու՝ «սրունքի ծակած-կտրած վերք» ախտորոշմամբ։
Ոստիկանության հասարակայնության հետ կապի և լրատվության վարչության պետի տեղակալ Էդգար Ջանոյանն էլ մեզ հետ զրույցում տեղեկացրել էր, որ վիճաբանություն է տեղի ունեցել Ղանդիլյան փողոցի բնակարաններից մեկում, այնուհետ՝ ժամը 16․22 րոպեին Գյումրի բժշկական կենտրոնից ոստիկանություն ահազանգ է ստացվել, որ իրենց մոտ են տեղափոխել երկու քաղաքացու՝ մեկը կին է, մյուսը տղամարդ՝ կտրած-ծակած վերք ախտորոշմամբ։
Նախնական տեղեկություններով, ընտանեկան խնդրի շուրջ է ծագել վիճաբանություն, որն ավարտվել է դանակահարությամբ։
Նունե ԱՐԵՎՇԱՏՅԱՆ
Լուսանկարը՝ Գագիկ Շամշյանի
