Կառավարությունն առաջարկել է փոփոխություններ եւ լրացում կատարել «Ժամանակավոր անաշխատունակության եւ մայրության նպաստների մասին» օրենքում, որի ընդունումը պայմանավորված է պրակտիկայում ի հայտ եկած որոշակի խնդիրների կանոնակարգման հետ:
Հիվանդության նպաստի տրամադրման համար նախատեսված աշխատանքային օրերի հաշվարկը եւ ժամանակավոր անաշխատունակության ժամկետի երկարաձգումն առաջարկվում է չկապել հաշմանդամության խմբի սահմանման կամ խմբի վերանայման հետ, քանի որ հնարավոր են դեպքեր, երբ անձի նկատմամբ սահմանվել է հաշմանդամություն, եւ անկախ այն հանգամանքից, որ անձը շարունակում է մնալ անաշխատունակ, այնուհանդերձ, ժամանակավոր անաշխատունակության թերթիկը հաշմանդամ ճանաչվելուց հետո չի երկարաձգվում:
Օրենքի նախագծով գործող իրավանորմերին համապատասխան հստակեցվել է «հաշմանդամություն ունեցող անձ» եզրույթը:
ՀՀ աշխատանքի եւ սոցիալական հարցերի նախարարի տեղակալ Դավիթ Խաչատրյանը նշել է, որ առաջին ընթերցումից հետո Կառավարությունն առաջարկել է նախագծի համապատասխան հոդվածի 2-րդ մասում «բժշկասոցիալական փորձաքննության» բառերը փոխարինել «ֆունկցիոնալության գնահատման», իսկ «բժշկասոցիալական փորձաքննություն իրականացնող իրավասու պետական մարմնի» բառերը` «անձի ֆունկցիոնալությունը գնահատող հանձնաժողովի» բառերով: Առաջարկությունը բխում է «Անձի ֆունկցիոնալության գնահատման մասին» օրենքից, որի համաձայն` 2023թ. փետրվարի 1-ից հաշմանդամության գնահատման բժշկասոցիալական մոդելը փոխարինվելու է ֆունկցիոնալության գնահատման մոդելով: Ըստ այդմ` «բժշկասոցիալական փորձաքննություն» եզրույթն անհրաժեշտ է փոխարինել «ֆունկցիոնալության գնահատում» եզրույթով:
Կարդացեք նաև
Օրենքն ուժի մեջ է մտնելու պաշտոնական հրապարակմանը հաջորդող օրվանից: Այս առնչությամբ գործադիրն առաջարկել է «օրվանից» բառից հետո լրացնել «բացառությամբ սույն օրենքի 1-ին հոդվածի 3-րդ մասի, որն ուժի մեջ է մտնում 2023թ. փետրվարի 1-ից» բառերով:
Հարակից զեկուցող հանձնաժողովի անդամ Լիլիթ Ստեփանյանը նշել է, որ առաջին ընթերցումից հետո բովանդակային փոփոխություններ չեն կատարվել:
Հանձնաժողովականները դրական եզրակացություն են տվել օրինագծին:
Հարցը քննարկվել է ԱԺ աշխատանքի եւ սոցիալական հարցերի մշտական հանձնաժողովի ապրիլի 26-ի նիստում:
ԱԺ
