Ինչպես հայտնել էինք, Կոմիտասի պողոտայում գտնվող Սուրբ Խաչ եկեղեցու բակից այսօր մեկնարկեց Նիկոլ Փաշինյանի հրաժարականի պահանջով եւ հանուն Արցախի փրկության գաղափարի շուրջ միավորման երթը։ Ցուցարարները մի պահ կանգ առան արագաչափերից մեկի մոտ։ Մեծ թվով ոստիկաններ փորձեցին խոչընդոտել, որպեսզի ցուցարարները չմոտենան մետաղական սյանը, սակայն «Հայաստան» խմբակցության պատգամավոր Գեղամ Մանուկյանը դժվարությամբ կարողացավ բարձրանալ սյան վրա եւ «խաբեբա» գրությամբ Նիկոլ Փաշինյանի նկարը փախցրեց արագաչափի վրա։
«Ժողովուրդ, մենք մեր առաջ ինչ խնդիր դնենք՝ անելու ենք։ Այսպես է լինելու ամեն օր։ Այդ ծաղրածուին չենք նմանակում։ Չորս տարի առաջ խաբեց ժողովրդին եւ ասաց, որ արագաչափերը հանելու է»,-բղավեց «Հայաստան» խմբակցության պատգամավոր Իշխան Սաղաթելյանը։ Իրավիճակը լարվեց։ Րոպեներ շարունակ քաղաքացիների եւ ոստիկանների միջեւ քաշքշուկ էր։ Ցուցարարները բղավելով կոչ արեցին մոտենալ ոստիկաններին, որպեսզի որեւէ ցուցարարի չկարողանան բերման ենթարկել։
«Ժողովուրդ, հետ եք քաշվում, ոստիկաններ, մի սադրեք»,-լսվում էր բարձրախոսից։ Կադրերում տեղ-տեղ ձեռնամարտ երեւաց։ «Ոստիկանը Նիկոլ չի, ոստիկանը հայ է»,-բղավում էր ցուցարարը։ Քաղաքացիները վերեւ պարզեցին ձեռքերը՝ ցույց տալու համար, որ իրենք բախում չեն ուզում։ Քիչ անց իրավիճակը հանդարտվեց, երթը շարունակվեց։
Լուիզա ՍՈՒՔԻԱՍՅԱՆ
