Բժշկական հաստատություններում անբարենպաստ դեպքեր են համարվում վիրահատությունների բարդությունները, հիվանդանոցում բուժվելու ժամանակ ներհիվանդանոցային վարակներ վերցնելը, դեղորայքից առաջացած ռեակցիաները, ուշացած կամ սխալ ախտորոշումները: ՀՀ առողջապահության նախարարության Հանրային առողջության բաժնի պետ Կարինե Գաբրիելյանի խոսքով, այդ իրավիճակները շտկելու համար պահանջվում են լրացուցիչ ֆինանսական միջոցներ, մինչդեռ, եթե խելամտորեն իրականացվեն եւ կանխվեն այդպիսի գործընթացները, բնականաբար, այդ ռեսուրսները չեն վատնվի:
Այսօր նախարարության պաշտոնյան «Արմենպրես»-ի մամուլի սրահում ներկայացրեց առողջապահության նախարարության ռազմավարության նախագիծը, որը բարելավելու է առողջապահական ծառայությունների որակը: Ըստ Կարինե Գաբրիելյանի, ռազմավարության նպատակն է առկա ռեսուրսների պայմաններում ապահովել անվտանգ, ծախսարդյունավետ, մարդակենտրոն բժշկական ծառայություններ: Նոր ռազմավարությունը կապվելու է առողջապահության համապարփակ ապահովագրության հետ:
«Զարգացած երկրներում էլ խնդիր է, որ անորակ բժշկական ծառայությունները բերում են ֆինանսական ռեսուրսների վատնումի: Անգամ զարգացած երկրներում շատ կարեւոր է բուժօգնության որակի բարելավման խնդիրը: Եվրամիության երկրներում իրականացրած ուսումնասիրությունը ցույց է տվել, որ յուրաքանչյուր 10 հիվանդից մեկի մոտ բուժման ընթացքում գրանցվում է վնասում կամ՝ բարդություն: Մեկ այլ ուսումնասիրություն վկայում է, որ այդ վնասումներից 5-ից 4-ը կանխարգելելի են, հետեւաբար այդ թվերը վկայում են այն մասին, որ խիստ կարեւոր է բուժօգնության որակը՝ հենց ֆինանսները ռացիոնալ օգտագործելու առումով»,-ասաց տիկին Գաբրիելյանը:
Նրա խոսքով, 2010-2015 թվականներին բուժօգնության որակի ակտիվ գործընթացների միջոցառումների հետեւանքով 5 տարվա ընթացքում հնարավոր է եղել խնայել 28 միլիարդ դոլար:
Հարցին՝ այսօր ամեն ինչ կենտրոնացած է Երեւանում՝ այդ թվում եւ բժշկական հիմնարկները, ի՞նչ են անում, որպեսզի մարզերում էլ այդ որակյալ ծառայությունները հասանելի լինեն, Կարինե Գաբրիելյանն ի պատասխան ասաց, որ ներկայումս մարզերում աննախադեպ ծավալի շինարարություն է ընթանում, որպեսզի որակյալ ծառայություններ մատուցվեն: Նա նշեց, որ ռազմավարությունը բաղկացած է վեց բաղադրիչից. այն կներդրվի փուլային տարբերակով:
ԱՆ պաշտոնյայի խոսքով, պետք է վերանայեն բուժհաստատությունների լիցենզավորման պահանջները, որ դրանք սնկի նման չաճեն՝ ինչպես տեղի է ունենում հիմա:
«Որպեսզի որակի բարելավման աշխատանքները լինեն շարունակական հարկավոր է բուժհաստատություններում նոր մշակույթի ստեղծում: Այսինքն՝ ոչ պատժիչ միջավայր ստեղծեն, որպեսզի մարդիկ չխուսափեն բարձրաձայնել այդ պատահարների, թերությունների մասին, եւ բուժանձնակազմը չվախենա, որ կպատժվի: Միջազգային պրակտիկայում կա հետեւյալ մոտեցումը՝ եթե անձի կողմից բացահայտվում է բուժօգնության որակի մասին թերություն, չպետք է կենտրոնանալ անձին պատժելու վրա, այլ, յուրաքանչյուր թերության հետեւում պետք է փորձել գտնել համակարգային թերություն, որի պատճառով այդ սխալը տեղի է ունենում»:
Լուսինե ԲՈՒԴԱՂՅԱՆ
