«Ցավում եմ, որ 2018 թվականին հղածս մաղթանքն այսօր էլ ավելի արդիական է»,- Հանրապետության հրապարակում հայտարարեց ՀՀ երրորդ նախագահ Սերժ Սարգսյանը՝ անդրադառնալով իր այն հայտարարությանը, որով մեր երկրին մաղթում էր խաղաղություն, ներդաշնակություն և տրամաբանություն:
Հիշեցմանը՝ 2018-ին իր հրաժարականի օրը ժողովուրդը ցնծություն էր ապրում և հարցին՝ այն ժամանակ ինքն ի՞նչ էր զգում և հիմա ինչ է զգում, Սերժ Սարգսյանը պատասխանեց․ «Կցանկանայի, որպեսզի այսօր էլ մեր ժողովուրդը ցնծար հրապարակում, որպեսզի այդ ժամանակահատվածում ցնծար նրա համար, որ կառուցել է ավելի լավ երկիր, ավելի բարեկեցիկ Հայաստան, ավելի հզոր բանակ, ավելի ապահով Արցախ, բայց, ցավոք, 2018-ին ցնծացող ժողովուրդը հիմա ողբում է կրկնապատկված, եռապատկված Եռաբլուրում, ողբում է Արցախի մի մասը կորցնելու համար, ողբում է մեր անպաշտպան սահմանների համար, կազմաքանդված բանակի համար, և այս առումով, իհարկե, ավելի շատ ցավ հիմա եմ ապրում, քան ապրել եմ 2018-ին այս օրը»։
Կարդացեք նաև
Հարցին՝ չի՞ փոշմանել, որ 2018-ի մարտ-ապրիլին ուժ չի կիրառել ժողովրդի նկատմամբ և այս քայլին է գնացել, Սերժ Սարգսյանը պատասխանեց․ «Իրականության մեջ ես չեմ փոշմանել, բայց եթե կարողանայի կանխատեսել այս ամբողջ արհավիրքը, միգուցե 2018-ի մարտ-ապրիլին այլ կերպ կգործեի։ Իրոք, չեմ փոշմանել, որ մեր խաբված ժողովրդի դեմ ուժ չեմ կիրառել։ Ուղղակի կցանկանայի, որպեսզի այսօր էլ 2018-ի պահանջատեր ժողովուրդը նույն պահանջատիրությամբ հանդես գար»։
Հարցին՝ ի՞նչ է մտածում թուրքերի հետ եղբայրություն անելու մասին հայտարարությունների առիթով, Սերժ Սարգսյանը պատասխանեց․ «Ես ինչ մտածում եմ, խոսում եմ դրա մասին։ Դուք մարդկանց բացատրեք՝ դա լա՞վ է, թե՞ վատ։ Ես այդտեղ մտածելու ոչինչ չունեմ»։
Տաթև ՀԱՐՈՒԹՅՈՒՆՅԱՆ
