Aravot.am-ն այսօր Ազատության հրապարակում «Հայրենիք» կուսակցության նախագահ Արթուր Վանեցյանից հետաքրքրվեց, թե ինչ է անելու ջահերով երթից հետո։
«Այսօր ժամը 18-ին հավաքվելու ենք այստեղ՝ Ազատության հրապարակում, որից հետո միանալու ենք ջահերով երթին, իսկ վաղը՝ ապրիլի 24-ին՝ Հայոց ցեղասպանության հիշատակի օրը, հայտարարված է լռության օր։ Մենք ոչինչ անել չենք նախատեսում, իսկ ապրիլի 25-ի առավոտից նորից կլինենք այստեղ՝ Ազատության հրապարակում եւ կսկսենք ապակենտրոն պայքարի երկրորդ՝ ավելի ակտիվ փուլը»,- պատասխանեց նա։
Հարցին՝ նկատի ունենալով Իլհամ Ալիեւի երեկվա հայտարարությունն այն մասին, որ եթե ընդդիմությունը Հայաստանում իրականացնի իշխանափոխություն՝ Ադրբեջանը չի ճանաչի Հայաստանի տարածքային ամբողջականությունը, այսինքն՝ մտավախություն կա՞, որ Ադրբեջանը կամ Թուրքիան այս դեպքում կարող են միջամտել իրադարձությունների զարգացմանը, Արթուր Վանեցյանը պատասխանեց. «Շատ վատ է, որ նման հարց առաջանում է այսօր հայկական օրակարգում։ Այդպիսի բան չպետք է լիներ։ Չեմ կարծում, որ արտաքին միջամտություն լինի, բայց անկախ ամեն ինչից, ժողովուրդը պետք է պայքարի եւ հասնի իր նպատակին՝ Արցախի ինքնորոշման իրավունքին»։
Կարդացեք նաև
Աշոտ ՀԱԿՈԲՅԱՆ
