Aravot.am-ն այսօր Ազատության հրապարակ եկած «Հայաստան» խմբակցության պատգամավորներին հարցրեց՝ ո՞նց եք ժողովրդին համոզելու, որ ձեր պայքարը աթոռի համար չի, անգամ ընդդիմադիր դաշտից ձեզ չեն հավատում: Գեղամ Նազարյանը պատասխանեց. «Նման մտադրություն չունենք: Ով նման միտք է հնչեցնում, նման հայտարարություններ է անում, ամո՛թ իրեն, Աստված իրեն դատավոր: Եթե աթոռի համար կռվեինք, ես էլ լավ աթոռ ունեմ, Մխիթար Զաքարյանն էլ, ընտիր աթոռներ են, կգնանք մեր տան աթոռներին կնստենք ու հանգիստ կվայելենք»:
Մխիթար Զաքարյանն էլ հավելեց. «Ախր այդ ասողը պիտի գնահատի իրավիճակը. այսօր մեր պետությունն այնպիսի վիճակում է, որ չարքաշ, տաժանակիր աշխատանք է պահանջվում: Եվ ընկալման խնդիր է՝ ով է իշխանությունը ընկալում՝ որպես վայելք ու ով է ընկալում՝ որպես չարքաշ աշխատանք: Այս իրավիճակում կռի՞վ աթոռի համար: Ես չեմ նախանձում հաջորդ իշխանությանը, ներկա իշխանությանն էլ չեմ նախանձում: Աննախանձելի դրության մեջ են: Հաջորդ իշխանություններին էլ շատ ծանր աշխատանք է սպասվում, բայց պատվաբեր՝ հաջողության հասնելու դեպքում»:
Կարդացեք նաև
Փոխանցեցինք իշխանականների տեսակետը՝ ներկայիս ընդդիմությունը եղել է իշխանություն, թալանել են, «կերել են, համը մնացել է բերանում», էլի են ուզում՝ Մխիթար Զաքարյանը պատասխանեց. «Ով ինչ արել է, թող դրա համար պատասխան տա: Իհարկե, թերություններ եղել են: Մենք նոր պետություն ենք կառուցել, պատերազմ, երկրաշարժ ու դա անցնելու ճանապարհին, իհարկե, բազմաթիվ սխալներ մեր պետությունը թույլ տված կլինի: Բայց սխալներից սովորելով, սպիրալաձեւ զարգացմամբ նորմալ ընթացքով գնում է մեր երկիրը ու այսօր գալ ու խոսել, թե ով ինչ թերությո՞ւն է ունեցել: Ես սա միշտ համեմատում եմ գիտեք ինչի հետ՝ ցանկացածս հայրական տուն ունենք, 90-ականներին է իմ ծնողը կառուցել տունը, հետո գալիս է նոր սերունդ, նոր շինարարական տեխնիկա, նոր պահանջներ ու սկսում ենք նորը կառուցել: Պատկերացրեք, այդ ընթացքում սկսենք քննադատել, թե այս ի՞նչ տուն է կառուցված, պադվալը լավ տեղում չի եւ այլն»:
Հռիփսիմե ՋԵԲԵՋՅԱՆ
