«Հայացք» վերլուծական կենտրոնի տնօրեն, քաղաքագետ Աննա Կարապետյանը Ազատության հրապարակում հանրային քննարկման ժամանակ հայտարարեց, որ Մոսկվայում կայացած Փաշինյան-Պուտին հանդիպումը տեղավորվում է Արեւմուտք-Ռուսաստան հակամարտության տրամաբանության մեջ:
Եթե Բրյուսելում Փաշինյան-Միշել-Ալիեւ հանդիպման ժամանակ ընդհանրապես խոսք չկար Արցախի մասին եւ խոսվում էր միայն Հայաստան-Ադրբեջան հարաբերությունները կարգավորելու մասին, ապա Մոսկվայի հանդիպումից հետո խոսեցին արցախյան հակամարտության կարգավորման մասին, բայց խոսք չկար Արցախի կարգավիճակի մասին: Սա մտահոգիչ է, բայց կարեւոր է, որ արձանագրվեց, որ արցախյան հակամարտություն կա, դրա շուրջ պետք է բանակցություններ լինեն՝ Մինսկի խմբի համանախագահության ձեւաչափով: Մոսկվայում խոսվել է նաեւ Հայաստան-Ադրբեջան երկխոսության մասին եւ չի նշվել խաղաղության համաձայնագրի մասին: Ըստ բանախոսի, Ռուսաստանը ցույց է տալիս, որ խաղաղության համաձայնագիր կնքելու շտապողականությունը իր համար ընկալելի չէ կամ ինչպես ասել է Ռուսաստանի արտգործնախարար Սերգեյ Լավրովը՝ դա հեռու ապագայի հարց է :
Նելլի ԳՐԻԳՈՐՅԱՆ
