Ռուսաստանի վարչապետ Միխայիլ Միշուստինը Մոսկվայում ընդունել է Հայաստանի վարչապետ Նիկոլ Փաշինյանին և առաջարկել արագացնել Հայաստանի հետ տնտեսական գործակցության նոր ծրագրի ստորագրման նախապատրաստական աշխատանքները:
Հանդիպմանը Միշուստինն ասել է, որ 2021թ. Ռուսաստանն ու Հայաստանն ավելացրել են երկկողմ ապրանքաշրջանառության ծավալները մոտ 13 տոկոսով՝ համեմատած նախորդ տարվա ցուցանիշի հետ՝ հասցնելով մինչև 2,6 մլրդ դոլարի: Ընթացիկ տարվա հունվար-փետրվար ամիսներին ապրանքաշրջանառությունն ավելացել է 42 տոկոսով՝ հասնելով մոտ 430 մլն դոլարի: Նա նշել է, որ Ռուսաստանն առաջին տեղն է զբաղեցնում Հայաստանի տնտեսության մեջ ներդրողների և արտաքին առևտրային գործընկերների շարքում:
«Մենք, իհարկե, շահագրգռված ենք ավելացնել երկկողմ գործակցությունը, սկսել նոր համատեղ ծրագրեր տարբեր ոլորտներում, ինչպիսին է էներգետիկան, լեռնարդյունաբերությունը, տրանսպորտային ենթակառուցվածքները, դեղագործությունը, ագրոարդյունաբերական համալիրը, թվային տնտեսությունը, բարձր տեխնոլոգիաները, նորարարությունը»,- ասել է Միխայիլ Միշուստինը:
Նիկոլ Փաշինյանն իր հերթին ասել է, որ Մոսկվայի և Երևանի առջև նոր «ընդհանուր մարտահրավերներ» են ծառացած: Թե կոնկրետ ինչ նկատի ունի՝ Փաշինյանը չի հստակեցրել: «Բայց կան նաև հնարավորություններ, որոնք կարելի է գրանցել և փորձել օգտագործել դրանք»,- ասել է Փաշինյանը:
Կարդացեք նաև
Պատրաստեց Վիկտորյա ԱՆԴՐԵԱՍՅԱՆԸ
