Հայաստանը ծերացող երկիր է․ սա, ըստ ՄԱԿ-ի սահմանած սանդղակի, նշանակում է՝ երկիրը, որտեղ տարեցների տեսակարար կշիռը 7%-ից բարձր է, համարվում է ծերացող, ՀՀ-ում տարեցների տեսակարար կշիռը մոտ 14% է։
Այս մասին այսօր «Մեդիա կենտրոնում» հրավիրված ասուլիսի ժամանակ ասաց ՄԱԿ-ի բնակչության հիմնադրամի «Բնակչություն եւ զարգացում» ծրագրի համակարգող Աննա Հովհաննիսյանը։ Նրա խոսքով՝ նման երեւույթը բնորոշ է աշխարհի այն երկրներին, որտեղ ծնելիության գումարային գործակիցը ցածր է եւ ունի նվազման միտում։
«Ըստ ՄԱԿ-ի բնակչության հիմնադրամի կանխատեսումների, 2050 թվականին մեր երկրում տարեցների տեսակարար կշիռը կկազմի 22-24%։ Սա նշանակում է, որ բնակչության 5-ից կամ 4-ից մեկը լինելու է կենսաթոշակառու։ Բայց ես չեմ ուզում սա դիտարկել որպես բացասական երեւույթ կամ մարտահրավեր, որովհետեւ տարեցները պետք է դիտարկվեն ոչ թե որպես բեռ, այլ՝ որպես հնարավորություն։ Ամբողջ աշխարհում է այդպես, որովհետեւ մարդիկ սկսել են ավելի երկար ապրել եւ դա շատ լավ է։ ՀՀ- ում կյանքի սպասվելիք տեւողությունն արդեն հասնում է աշխարհում ամենաբարձր ցուցանիշ ունեցող երկրին՝ Ճապոնիային։ Պաշտոնական վիճակագրությամբ, կանայք ապրում են մոտավորապես 79 տարի, տղամարդիկ՝ 72։ Սա լուրջ դրական ցուցանիշ է, որի հիմքում ընկած է առողջապահական ծառայությունների բարելավումն ու հասանելիությունը։ Սա վիճակագրական թվերի տասը եւ ավելի տարիների համեմատության արդյունքում արված ենթադրություն է»։
Քննարկման մյուս մասնակից, ժողովրդագիր Ռուբեն Եգանյանն էլ նկատեց` բնակչության ծերացմանը պետք է սթափ մոտենալ եւ փորձել դա վերածել հնարավորության, իհարկե մինչեւ այն տարիքը, երբ մարդիկ չնայած անցնում են թոշակի, բայց շարունակում են մնալ ակտիվ, ստեղծարար եւ կարողություններ ունեցող․ «Բայց գալիս է տարիքային մի սահմանագիծ, որից հետո այդ մարդիկ հասարակության հոգածությանն են մնում»։
Կարդացեք նաև
Եգանյանը չհամաձայնեց Ճապոնիայի հետ համեմատությանը, եւ նշեց՝ մենք ոչ թե ծերացող, այլ արդեն ծերացած երկիր ենք, նույնիսկ ՄԱԿ-ի չափորոշիչներով․ «Մենք դեռ այնքան հեռու ենք Ճապոնիայից, այնտեղ կնոջ կյանքի սպասվող միջին տարիքը 83-84 տարի է»։
Աննա Հովհաննիսյանն էլ պատասխանեց, որ իր մեկնաբանությունը միջազգային փորձի հիման վրա է արված․ «Եթե կա ավելի լավ բացատրություն, թե ինչու էր տարեցը մինչեւ 60 տարի ապրում, հիմա` 79-ը․․․»։
Մանրամասները՝ տեսանյութում
Նելլի ԲԱԲԱՅԱՆ
