«Այս վարչակարգը պետք է հեռանա, բայց երկիրը ցնցումների մեջ պետք է չհայտնվի, որովհետեւ մեր երկրի շուրջն ատամները սրած սպասում են թշնամիները։ Ուստի մեր պայքարի ժամանակ թշնամու առաջ նոր դուռ չպետք է բացենք, պետք է գործենք խաղաղ, օրինական, սահմանադրական ճանապարհով»,-Ազատության հրապարակում այսօր դիմելով հանրությանը՝ հայտարարեց «ԱրԱր» հիմնադրամի համահիմնադիր Ավետիք Չալաբյանը։
Ինչպես հայտնել էինք, 5165 շարժումն այսօր իջեցրեց կուսակցական դրոշն ու Ազատության հրապարակում միացավ Նիկոլ Փաշինյանի հրաժարականի պահանջին եւ Արցախը փրկելու գաղափարի շուրջ համախմբմանը, մյուս կուսակցություններին էլ նույնը կոչ արեց:
«Այս հնարավորությունը կա։ Մենք խորհրդարանական երկիր ենք, եւ խորհրդարանում նոր մեծամասնություն ձեւավորելու հնարավորություն խնդիր կա, եթե 71 իշխանական պատգամավորներից գոնե 20-նն անցնեն հակառակ ճամբար։ Հնարավորություն կա նաեւ նոր խորհրդարանական ընտրությունների գնալու, որը, սակայն, պակաս ձեռնտու է, որովհետեւ անկայունության հիմք է տալիս։ Ուստի մեր խնդիրն է խելամիտ ճանապարհով գնալ եւ այսօրվա իշխանական պատգամավորների գոնե 1/3-ին համոզել ճամբար փոխել։ Սա իրատեսական է»,-համոզմունք հայտնեց Ավետիք Չալաբյանը։
Կարդացեք նաև
Նրա խոսքով՝ ՀՀ պատմության ընթացքում արդեն երկու անգամ նման նախադեպ է եղել․ «Առաջինը 1997-98թ․-ին, երբ ՀՀՇ-ի մի շարք պատգամավորներ անցան «Երկրապահ» խմբակցություն, եւ Տեր-Պետրոսյանը հրաժարական տվեց։ Իսկ 2018թ․-ին որոշ ՀՀԿ պատգամավորներ անցան Նիկոլ Փաշինյանի կողմը։ Այսպես հնարավոր է ձեւավորել նոր՝ ազգային համաձայնության կառավարություն, որի ղեկավար չպետք է լինի ՀՀ նախկին նախագահներից եւ ոչ մեկը»։
Լուիզա ՍՈՒՔԻԱՍՅԱՆ
