Երեւանի ավագանու այսօրվա նիստում ընդունվեց որոշում, ըստ որի նախատեսվում է 2022 թվականի բյուջեի եկամտային մասով ընթացիկ նպատակային հատկացումները՝ սուբվենցիաները ավելացնել 22 մլն 330 հազար դրամով եւ այն ուղղել պատերազմի հետեւանքով ժամանակավորապես ՀՀ-ում գտնվող քաղաքացիներին մշտական բնակության վայր տեղափոխման իրականացմանը։
Ավագանու անդամ Էռնեստ Ավանեսովը հետաքրքրվեց՝ արդյոք ընդհանարապես նախատեսվո՞ւմ է առաջին պատերազմի ժամանակ, դրանից առաջ եւ հետո ՀՀ տեղափոխված, Ադրբեջանից բռնագաղթված հայ ընտանիքներին բնակարաններով ապահովելու համար ծրագիր կամ գումար։ Հարցը զեկուցող քաղաքապետի առաջին տեղակալ Լեւոն Հովհաննիսյանն ի պատասխան ասաց, որ ղարաբաղյան առաջին պատերազմի ժամանակ Ադրբեջանից տեղահանված քաղաքացիների բնակարանային խնդիրների լուծման համար Երեւանի 2022 թվականի բյուջեով միջոցներ նախատեսված չեն:
Այս նույն նախագծով նաեւ առաջարկվում է Ասիական բանկի աջակցությամբ իրականացվող քաղաքային ենթակառուցվածքների եւ քաղաքի զարգացման ներդրումային միջոցառումների ծրագրով նախատեսել 75 մլն 48 հազար դրամ՝ Տիչինա -Բաբաջանյան ճանապարհահատվածի կառուցման շինարարական աշխատանքների փոխհատուցումների նպատակով։
Նելլի ԲԱԲԱՅԱՆ
