Այսօր Ազատության հրապարակում հացադուլ հայտարարած Նվեր Կիրակոսյանն ու Արթուր Ավագյանը հայտարարությամբ հանդես եկան: Նրանք վստահեցրին, որ իրենց ինքնազգացողությունը լավ է, շտապօգնության արդեն երեք բրիգադ է ստուգել:
Նվեր Կիրակոսյանն ասաց, որ հացադուլը շարունակելու են ու իրենց ուղերձը սա է. «Մեր հացադուլը կհամարվի կատարված, եթե անկախության սերնդի ներկայացուցիչները այստեղ հավաքվեն: Գան մարդիկ, որոնք կիսում են մեր մտահոգությունը ու պատրաստ են պայքարել»:
Արթուր Ավագյանն էլ ասաց. «Եթե դու հետամուտ չես լինում արցախյան շարժմանը, ընդհանուր իմաստին, դու դառնում ես անկախության ժամանակ ծնված մարդ: Բայց եթե որեւէ հայ իրեն համարում է այդ խիզախումների ժառանգորդ, ուրեմն ինքը անկախության սերնդի ներկայացուցիչ է: Հիմա պահը պահանջում է, որ անկախության սերունդը պայքարի դրոշ բարձրացնի ու իր դիրքորոշումը հայտնի: Անկախության սերունդն է ժառանգորդը Արցախի ու ամենածանրակշիռ կարծիքը հենց ինքը պետք է ասի: Մենք ասում ենք՝ տղե՛րք, այն, ինչ անում էիք մինչեւ այսօր, անլուրջ է: Մի հատ նայեք՝ ինչ է արվել Արցախ ունենալու, Արցախ պահելու համար ու ինչ եք հիմա դուք անում՝ որպես ժառանգորդ: Ֆեյսբուքում կամ ինչ-որ հարթակներում Մոնթեի նկարն եք դնում, դա բավարար չի, դու դրա տակ պախկվում ես, այդպես չի լինի»:
Կարդացեք նաև
Նա նկատեց, որ եթե անկախության սերունդը այսօր պատրաստվում է կուլ տալ, օրինակ, «Արցախը՝ Ադրբեջանի կազմի մեջ», ապա վախը գալու է Հայաստան, Երեւան. «Դրա փոխարեն մեզ ասում են՝ տղերք, սահմանը կբացվի, կգա փող, մենք էլ ասում ենք՝ եթե ունենաս փող, չես կարող ինչ-որ տեղից խիզախություն առնես ինչ-որ մի գնով: Այն ժամանակ, երբ որ պատիվը, հայրենիքը պահանջի ներկայանաս, դու փախչելու ես»:
Նրանք կոչ արեցին բոլոր համալսարանականներին, դասախոսներին, մանկավարժներին, ծառայակից ընկերներին, նախկին զինվորներին, երիտասարդներին, IT ոլորտի գործիչներին, մտավորականներին այսօր ժամը 19:30-ից մինչեւ 21:00-ին գալ Ազատության հրապարակ՝ հանրային քննարկման մասնակցելու ու խոսելու անկախության սերնդի հանձնառության մասին:
Նրանք վստահեցրին, որ եթե կրիտիկական զանգված հավաքվի, քայլեր կձեռնարկեն: Թե քանի՞ մարդ է կազմելու իրենց պատկերացրած զանգվածը՝ Կիրակոսյանը պատասխանեց, որ քանակով չեն կարող ասել, դա այն զանգվածն է, որը իր գաղափարական հենքով ու գործողությունների փաթեթով ներուժ է ունենալու:Դրանից հետո կներկայացնեն ճանապարհային քարտեզը:
Հռիփսիմե ՋԵԲԵՋՅԱՆ
