Ադրբեջանի հարցերով փորձագետ Արմինե Ադիբեկյանը, որ երեկ իր ներկայությամբ աջակցել է «Հայրենիք» կուսակցության նախագահ Արթուր Վանեցյանի հայտարարած անհամաձայնության անժամկետ նստացույցին եւ այսօր էլ պատրաստվում է լինել «Ազատության» հրապարակում, «Հայելի» ակումբում իր մտորումները հայտնեց ապագայի մասին, որն այսպես շարունակվելու դեպքում նրան լավատեսության հույս չի տալիս:
«Ուզում եմ հանրությանն ասել, որ եթե մենք այսօր վախենում ենք պաշտպանել մեր հայրենիքը նրանից, ով քանդեց մեր երկիրը, պառակտեց հասարակությունը, մեզ ծնկի բերեց նրանց առջեւ, որոնք իրենք էին 30 տարի մեր առջեւ ծնկած եւ չվռնդենք Նիկոլ Փաշինյանին, նրա տեղը վաղը զբաղեցնելու է , ասենք, Հեյդար Ալիեւ կրտսերը որպես Էրմենիստան շրջանի գործադիր կոմիտեի ղեկավար: Սա է այս իշխանության օրոք ամենատեսանելի ապագան: Դրա համար ոչնչից պետք չէ վախենալ, պետք է պայքարել: Վախենալն անիմաստ է, որովհետեւ ամենամեծ սարսափը ապագայում է, առջեւում: Եվ մենք ամեն ինչ ուզում ենք անել, որպեսզի կանխենք այդ սարսափելի զարգացումները: Մենք հիմա պետք է կանգնենք, պատնեշ դառնանք այդ ապագայի առջեւ: Իսկ նա, ով ուզում է մեզ թելադրվող պայմաններով խաղաղություն ունենալ, խնդրեմ, Շուռնուխ, Դավիթ Բեկ, Ճակատեն: Գնացեք այնտեղ, ապրեք, խաղաղություն կերտեք: Ցույց տվեք, թե ոնց է լինում, որ թուրքը ավտոմատը պահում է երեխայիդ վրա, իսկ դու երջանիկ խաղաղություն ես կերտում»,-ասաց տիկին Ադիբեկյանը:
Աշոտ ՀԱԿՈԲՅԱՆ
