«Հայրենիք» կուսակցության անդամ Սոս Հակոբյանի համոզմամբ՝ թուրքական ազդեցության գոտու վերածվելու գործընթացը պետք է կասեցվի համազգային համախմբմամբ։ «Այստեղ գալը գործիք է մարդկանց հետ կապ ունենալու։ Այլ ընդդիմադիրներ եւս ցանցային գործողություններ են սկսում։ Ամեն մեկն իր բաժին գործը պետք է անի։ Եթե թողնենք ինքնահոսի, քաղաքական դաշտն այլեւս ոչինչ չի ունենալու անելու, պետության կորստի առաջ կկանգնենք»,-Ազատության հրապարակում լրագրողների հետ ճեպազրույցում այսօր հայտարարեց Սոս Հակոբյանը։
Հիշեցնենք, որ ԱԺ «Պատիվ ունեմ» եւ «Հայաստան» խմբակցությունները, նրանց համակիրներն ու մի շարք այլ հասարակական-քաղաքական գործիչներ ապրիլի 17-ից նստացույց են անում Ազատության հրապարակում՝ Նիկոլ Փաշինյանի հրաժարականի, Արցախն ու ՀՀ-ն զիջումների չտանելու պահանջներով։
Անդրադառնալով ԱԺ ՔՊ խմբակցության պատգամավոր Էդուարդ Աղաջանյանի հայտարարությանը, որ Արցախի գործընկերները սխալ են հասկացել ՀՀ իշխանության դիրքորոշումը, եւ որ Նիկոլ Փաշինյանի ելույթում Արցախն Ադրբեջանի կազմում թողնելու մասին խոսք չկա՝ Սոս Հակոբյանը շեշտեց․ «Այս իշխանությունը տասը րոպեն մեկ իրար հակասող բաներ է ասում։ Փաստենք, որ իշխանության ներկայացուցիչները կասկածի տակ դրեցին Արցախի՝ Ադրբեջանի կազմից դուրս լինելու հնարավորությունը, ասեցին, թե կարգավիճակի նշաձող պետք է իջեցնել, ինչից հետո կապիտալիստ պատգամավորները սկսեցին ասել, թե թուրքերը փող կներդնեն ՀՀ-ում եւ այդ երաշխիքով մեր վրա չեն հարձակվի։ Եթե Արցախի իշխանությունն ու ԱԺ-ն վստահ չլինեին, որ իշխանության պայմանավորվածությունն Արցախն Ադրբեջանի կազմում թողնելն է, հստակ դիրքորոշում չէին արտահայտի»։
Կարդացեք նաև
Լուիզա ՍՈՒՔԻԱՍՅԱՆ
