Այսօր կառավարության նիստից հետո կառավարության անդամների ճեպազրույցի ժամանակ ԿԳՄՍ նախարար Վահրամ Դումանյանը հրաժարվեց կոնկրետ լրատվամիջոցի կոնկրետ լրագրողի հարցերին պատասխանել։ Նախարարն իր մերժումը հեգնական երանգներով ներկայացրեց։
«Հրապարակի» լրագրող Վահե Մակարյանը նախարարից փորձեց հետաքրքրվել, թե նախարարը, որպես իշխող ուժի եւ կառավարության թիմի անդամ, Նիկոլ Փաշինյանի՝ ԱԺ-ում ելույթներից հետո ինչ եզրահանգման եկավ։
Վահե Մակարյան-Ես մի հարց եմ ուզում ուղղել ձեզ, որպես այս քաղաքական թիմի անդամ եւ կառավարության անդամ։
Վահրամ Դումանյան-Որպես դո՞ւք եք այս քաղաքական թիմի անդամ, թե՞ ես։
Կարդացեք նաև
Վ․Մ․-Դուք:
Վ․Դ․- Հա, ինձ՝ որպես քաղաքական թիմի անդամ։ Դուք ասացիք՝ ես ձեզ ուզում եմ հարց ուղղել՝ որպես քաղաքական թիմի անդամ։
Լրագրողը հարցը կրկնեց եւ այն ձեւակերպեց կետադրական նշանները բարձրաձայն արտասանելով՝ ձեզ, բութ, որպես․․․
Նախարարն էլ շարունակեց՝ ուրեմն ճիշտ ձեւակերպեք, այսուհետ բութն ու ստորակետը բարձրաձայն կասեք։ Լրագրողն էլ մասամբ այդպես վարվեց, ու հարց ուղղեց՝ արդյոք Փաշինյանը պատրաստվում է Արցախը ճանաչել Ադրբեջանի մաս։ Լրագրողի հարցն ամբողջությամբ չենք ներկայացնում։ Սակայն նախարարը այն մինչեւ վերջ լսելուց հետո, պատասխանեց․ «Ձեզ, բութ, որպես լրագրող, ես չեմ ցանկանում պատասխանել ձեր, բութ, տրված հարցին»։
Կառավարության նախորդ նիստից հետո էլ էկոնոմիկայի նախարար Վահան Քերոբյանն է հրաժարվել նույն լրագրողի հարցերին պատասխանել։
Նելլի ԲԱԲԱՅԱՆ
