«Ակնհայտ է, որ եթե Հայաստանում ռուսական բազա չլիներ, Լեռնային Ղարաբաղի պատերազմը, ամենայն հավանականությամբ, կհասներ Հայաստան։ Բացի այդ, կարծում եմ, որ թուրքական զորքերն անմիջականորեն կներգրավվեին այս պատերազմին, այդ թվում՝ Հայաստանի տարածքում»,- այսօր «Սպուտնիկ Արմենիա» մամուլի կենտրոնում կայացած Մոսկվա-Երեւան տեսակամուրջի ժամանակ հայտարարեց ռուս քաղաքագետ Սերգեյ Միխեեւը:
Հարցին՝ ի՞նչ է պակասում ՀՀ-ին եւ ՌԴ-ին իրենց հարաբերությունների համար, ռուս քաղաքագետը պատասխանեց՝ ընդհանուր սահման, ապա հավելեց, որ երկու երկրներին պետք է ամրապնդել տնտեսական ոլորտում կապերը, ինչպես նաեւ անվտանգային հարցերով համագործակցություններն ավելի մեծացնել: Քաղաքագետը բացասական է գնահատում Հայաստանի «արեւմտյան խաղերը», սակայն Կրեմլում, ըստ նրա, այդ ամենով հանդերձ, շարունակում են Հայաստանին համարել ռազմավարական գործընկեր: Նա հիշեցնում է, որ օրերս նախատեսված է Պուտին-Փաշինյան հանդիպումը Մոսկվայում եւ կախված գործընթացներից՝ առավել հստակ կլինի պատկերը: Ամեն դեպքում, իր կարծիքով ԵԱՏՄ-ում ՀՀ-ի եւ ՌԴ-ի համագործակցությունը կարևոր է եւ չարժե դրանք «քոռուփուչ անել»:
Խոսելով Արեւմուտքի՝ ՌԴ-ի դեմ կիրառվող սահմանափակումների մասին էլ, բանախոսն ասաց, որ Արեւմուտքը պատրաստ է գնալ ավելի հեռու: Իր գնահատմամբ, սա ոչնչացման պատերազմ է, համենայնդեպս, Արեւմուտքը նման նպատակ է իր առջեւ դրել: Ինչեւէ, ինքը կարծում է, որ դա Արեւմուտքը չի հաջողելու, ավելի բարդ ժամանակներ էլ են եղել: Ընդհանուր առմամբ, Սերգեյ Միխեեւը կարծում է, որ ՌԴ-ի դեմ սահմանափակումները բումերանգի էֆեկտով արդեն սկսել են անդրադառնալ եւ տպավորություն է, որ ԱՄՆ-ի խնդիրը Եվրոպան է, ոչ թե ՌԴ-ն, վերահսկողությունը Եվրոպայի վրա, ինչի համար էլ ներգրավվեց Ուկրաինան:
Կարդացեք նաև
Ռուս քաղաքագետը հավաստիացնում է՝ անկախ ուկրաինական խնդրի լուծման ելքից, Ռուսաստանի աշխարհաքաղաքական շահերն այլ տարածաշրջաններում՝ Հարավային Կովկաս, Կենտրոնական Ասիա եւ այլն, ուժի մեջ են մնում։ Նա համամիտ է, ուկրաինական իրադարձություններն այժմ ավելի շատ ուշադրություն են գրավում, շեղում են ՌԴ-ի ռեսուրսները, սակայն, դա ընդամենը մի հատված է՝ աշխարհաքաղաքական ազդեցության համար պայքարի համապատկերում:
Նելլի ԳՐԻԳՈՐՅԱՆ
