Մրցակցության պաշտպանության հանձնաժողովը մեր երկրի կարեւորագույն կարգավորող մարմիններից է, որի բարեխիղճ եւ արդյունավետ աշխատանքն ուղղակիորեն նպաստում է երկրի տնտեսական զարգացմանը. այս մասին ասել է Անուշ Բեղլոյանը՝ Մրցակցության պաշտպանության հանձնաժողովի անդամի ընտրության հարցի քննարկման ժամանակ:
Անուշ Բեղլոյանի թեկնածությունն առաջադրել է «Քաղաքացիական պայմանագիր» խմբակցությունը, իսկ նույն խմբակցության պատգամավոր Բաբկեն Թունյանը ներկայացրել է թեկնածուի կենսագրական եւ մասնագիտական տվյալներն ու աշխատանքային գործունեությունը:
Թեկնածուի համոզմամբ՝ մրցակցությունը խթանում է նորարարությունը, արտադրողականությունը եւ նպաստում արդյունավետ բիզնես միջավայրի ստեղծմանը, մեծացնում երկրի ներդրումային գրավչությունը՝ ապահովելով ինչպես ազգային, այնպես էլ օտարերկրյա ներդրումներ, օգուտ բերելով սպառողներին:
Անուշ Բեղլոյանի կարծիքով՝ չնայած մրցակցության առավելություններին՝ հակամրցակցային գործողությունները երկու հիմնական պատճառներով դեռեւս տարածված են: Առաջինն արմատացած գործարար վարքագիծն է, որը զսպում է մրցակցությունը, իսկ երկրորդը՝ պետության նորմատիվ կարգավորումներն են կամ շուկաների միջամտությունը, ինչը ծանրաբեռնում է եւ բացառում մրցակցությունը: Նա հավաստիացրել է, որ այս խնդիրներն իր գործունեության առանցքում են լինելու: Թեկնածուն կարեւորել է մտավոր սեփականության ինստիտուտի պաշտպանությունը:
Կարդացեք նաև
Ելույթի ավարտին Անուշ Բեղլոյանը հավաստիացրել է, որ ընտրվելու դեպքում լինելու է անաչառ, ընթացիկ վարույթների վերաբերյալ որեւէ հրապարակային մեկնաբանություններ չի տալու, լսելու է վարույթների բոլոր կողմերին, վարչական վարույթն իրականացնելու է արդյունավետ եւ ժամանակին: Նրա խոսքով՝ ընդունելու է որոշումներ, որոնք հավասարաչափ են եւ՛ տնտեսվարողի վարքագծի, եւ՛ պատճառած վնասի բնույթին, աշխատելու է թափանցիկ՝ հրապարակային դարձնելով վերահսկողության արդյունքները:
Քվեարկությունից հետո ԱԺ հաշվիչ հանձնախմբի նախագահ Նարեկ Բաբայանը տեղեկացրել է, որ քվեարկությանը մասնակցել է 67 պատգամավոր: Մեկ քվեաթերթիկ անվավեր է ճանաչվել: Անուշ Բեղլոյանը 66 կողմ ձայնով ընտրվել է Մրցակցության պաշտպանության հանձնաժողովի անդամ:
ՀՀ ԱԺ փոխնախագահ Ռուբեն Ռուբինյանը տեղեկացրել է, որ «Պատիվ ունեմ» եւ «Հայաստան» խմբակցությունները Մրցակցության պաշտպանության հանձնաժողովի անդամի պաշտոնում առաջադրել են Անահիտ Սարգսյանի թեկնածությունը: Թեկնածուի ներկայացման համար ձայնը պետք է տրվեր պատգամավոր Հայկ Մամիջանյանին, ով դահլիճում չէ: «ԱԺ կանոնակարգ» օրենքի համաձայն՝ հարցի քննարկումը հետաձգվել է:
ՀՀ Ազգային ժողով
