«Ի՞նչ կարգի տնտեսություն, բանակ ու կրթություն կունենայինք ՀՀ-ում, եթե խաղաղության օրակարգն ունենայինք թեկուզ 2000 կամ 2001թ․-ին։ ՀՆԱ-ն առնվազն 4-5 անգամ ավելի մեծ կլիներ, միջին աշխատավարձը՝ երկու անգամ բարձր, շատ խնդիրներ էլ լուծված կլինեին»,-ԱԺ լիագումար նիստում այսօր նման կարծիք հայտնեց Խաչատուր Սուքիասյանը։
«Քաղաքացիական պայմանագիր» խմբակցության պատգամավորի խոսքով՝ քաղաքական գործիչները պետք է համարձակություն ունենան ժողովրդին ասելու, որ սա է միակ ճանապարհը։
Խաչատուր Սուքիասյանի խոսքով․ «1997թ․-ի ազգային անվտանգության խորհրդի նիստի արդյունքներով, սակայն, ՀՀ-ն շեղվեց եւ այլ ճանապարհով գնաց։ Դա հասարակությանը շեղելն էր, խեղաթյուրել, ազգային տարբեր բաներ օգտագործել, դրոշակներ վառել․․․չգիտեմ ինչ կարգի կենացներ խմել։ Բայց դրանով ոչ բանակ կարողացանք կառուցել, ոչ առողջապահությունը զարգացնել»։
Պատգամավորի համոզմամբ՝ այն հարեւան երկրները, որոնք հետ չենք ունեցել հարաբերություններ եւ առեւտրաշրջանառություն, պետք է աշխատել այդ ամենն ունենալու ուղղությամբ․ «Որովհետեւ աշխարհում պետությունները, որոնք հարեւանների հետ ունեն առեւտրաշրջանառություն, հարեւանը հարեւանի ՀՆԱ-ի մեջ 5-15% կազմ է ունենում։ Դրանք զսպող գործիքներ են, որոնք գործում են կոնֆլիկտների դեպքում»։
Կարդացեք նաև
Ապա Սուքիասյանը վարչապետ Նիկոլ Փաշինյանին շնորհակալություն հայտնեց ելույթի, անկեղծության ու խաղաղության օրակարգն առաջ տանելու համար։
Նախկին նախագահներին էլ նա հարց հղեց՝ ինչո՞ւ Արցախի հարցը չլուծեցին, ինչո՞ւ չգրավեցին ողջ տարածաշրջանը․ «Սա անընդունելի է, հասարակությանը պետք է ասել դառը ճշմարտությունը։ Հասարակությունը բոլորից խելոք է»։
Լուիզա ՍՈՒՔԻԱՍՅԱՆ
