«Մենք միջազգային կառույցներին կա՛մ պիտի ասենք՝ դուք մեզ չեք հասկանում, ռադներդ քաշեք, մենք գնում ենք հեսա գրավենք Բաքուն, կամ էլ ասում ենք՝ հասկացանք, եթե դուք դա եք ասում՝ ի՞նչ նկատի ունեք: Այսինքն, մենք գնում ենք երկխոսության»,-այսօր լրագրողների հետ զրույցում ասաց ՔՊ պատգամավոր Վիգեն Խաչատրյանը:
Նա ասաց, որ անկեղծ ներկայացրել են՝ ինչ են բանակցելու ու դա ներկայացնում են, իբր թե իշխանությունները հրաժարվում են Ղարաբաղից:
Հարցին՝ այդ դեպքում Փաշինյանն ինչո՞ւ էր հայտարարում, որ Արցախը Հայաստան է եւ վերջ՝ Վիգեն Խաչատրյանը պատասխանեց. «Որովհետեւ երբ Փաշինյանը ստացավ ժողովրդի վստահությունը, շատ հայտնի ուժեր սկսեցին Ղարաբաղը տրամադրել Հայաստանի դեմ ու փորձեցին հակադրել Ղարաբաղը Հայաստանին: Այդ ժամանակ Փաշինյանը փորձեց հասկացնել, որ դուք ու մենք նույնն ենք, մի տրամադրվեք Հայաստանի դեմ»:
Կարդացեք նաև
Հարցին՝ Արցախի ընդդիմադիրներն ասում են՝ ի՞նչ են նշանակում Հայաստանի իշխանականների այն հայտարարությունները, թե թող Քոչարյանը գնա Ղարաբաղում ապրի, այդպես որ լիներ, ուրեմն Փաշինյանն էլ թող գնա Իջեւանում ապրի՝ Վիգեն Խաչատրյանը պատասխանեց. «Դա տաֆտալոգիա է: Քոչարյանը որտեղի՞ց է եկել, դա հիշեք, էլի՝ Ղարաբաղի հանրապետությունից՝ ա՛յլ պետությունից է եկել՝ անկախ, որը մենք հարգում ենք: Եվ եթե այդ պետությունը վտանգված է, ինքն էլ դահուկ է քշում, առյուծ է սպանում, ասում ենք՝ դրա տեղը գնա ղարաբաղցիներին ոգեւորի, որ դու հետ ես եկել, գնա ցույց տուր, որ այդ հողը մարդով է պահվում»:
Հռիփսիմե ՋԵԲԵՋՅԱՆ
