Aravot.am-ի տեղեկություններով, շաբաթ օրը ՀՀ կառավարության բարձրաստիճան անդամների, ոստիկանապետ Վահե Ղազարյանի ու ոստիկանության այլ պաշտոնյաների ուղեկցությամբ Գյումրի կժամանի ՀՀ վարչապետ Նիկոլ Փաշինյանը։
Մեր տեղեկություններով, այս տարի ոստիկանության աշխատողի օրը նշվելու է Գյումրիում։
Հիշեցնենք, որ ապրիլի 16-ին նշվում է հայ ոստիկանների մասնագիտական տոնը, այն այս տարի նախորդում է Սուրբ Զատկի տոնին, համընկնում Ավագ շաբաթ օրվա հետ։
Ըստ Եկեղեցական կարգի՝ Ավագ շաբաթ օրը երեկոյան մատուցվում է Ճրագալույցի Սբ. Պատարագ, որի ավարտին ազդարարվում է Փրկչի հրաշափառ Հարության ավետիսն ու ավարտվում է Մեծ Պահքը:
Կարդացեք նաև
Հանդիսավոր միջոցառումից բացի՝ բնականաբար կլինի նաև հյուրասիրություն։
Թե որտեղ կլինի հանդիսավոր միջոցառումը, դեռ կոնկրետ վայր չի նշվում, հայտնի է միայն, որ ՀՀ կառավարության ղեկավարը կմասնակցի ՀՀ ճանապարհային ոստիկանության գրանցման-հաշվառման և քննական հյուսիսային կենտրոնի բացմանը։
Ինչպես տեղեկանում ենք Police.am-ի կայքի հայտարարությունից, այս կենտրոնն ապրիլի 11-ից սկսած գործում է նոր հասցեում՝ Գյումրու Թբիլիսյան խճուղում տեղակայված ՀՀ ՊԵԿ հյուսիսային մաքսատան վարչության շենքում։ Չի բացառվում, որ հանդիսավոր միջոցառումը լինի հենց այստեղ։
Նունե ԱՐԵՎՇԱՏՅԱՆ
