Aravot.am-ը ԱԺ «Հայաստան» խմբակցության պատգամավոր Գեղամ Մանուկյանից հետաքրքրվեց, թե ի՞նչ խնդիր էր ծագել, եւ ինչու ընդդիմադիր պատգամավորները չէին կարողանում մուտք գործել Արցախ:
«Դա Նիկոլ Փաշինյանի եւ Ալիեւի հերթական ստվերային պայմանավորվածության հետեւանքն է՝ սահմանափակել դեպի Արցախ երթեւեկը նաեւ քաղաքական գործիչների համար: Այսօր խաղաղապահների ձեռքին էին միայն ԱԺ պատգամավորների՝ մեր անունները: Չի բացառվում, որ վաղը այլ անուններ եւս հայտնվեն նրանց ձեռքին: Հատկանշական է, որ նաեւ Գորիսի Տեղ գյուղի մոտ մեր սահմանապահներն այլեւս հատուկ հսկողություն են սահմանել: Մեր հարցին ի պատասխան ասացին՝ որ դա այսօրվանից է, ընդ որում, պատգամավորների բոլոր անձնական տվյալները հատուկ արձանագրում էին ու փորձում էին ճշտել, թե Արցախ կոնկրետ, որ պատգամավորներն են ուզում մուտք գործել, որ նրանց տվյալները փոխանցեին ռուս խաղաղապահներին»,-ասաց Գեղամ Մանուկյանը:
Նրա ձեւակերպմամբ. «Սա Փաշինյան-Ալիեւ հերթական պայմանավորվածության շրջանակում է եւ խոսում է այն մասին, որ հերթական դավադիր ծրագիրն է՝ Արցախը մեկուսացնելու, Արցախը հայաթափելու շուրջ»:
Գեղամ Մանուկյանը նաեւ հավելեց, որ Արցախի խորհրդարանական բոլոր խմբակցությունների ղեկավարների հետ հանդիպումն ամեն դեպքում կայացել է Աղավնոյի անցակետում, այդ ամսին ֆեյսբուքյան գրառմամբ տեղեկացրել էր նաեւ «Հայաստան» խմբակցության մեկ այլ պատգամավոր՝ Իշխան Սաղաթելյանը: Վերջինս իրենց այցի հետ կապված Ադրբեջանի և ՀՀ օրվա իշխանությունների արձագանքը որակել էր նույնական եւ փոխլրացնող:
Կարդացեք նաև
Գոհար ՀԱԿՈԲՅԱՆ
