«Ընդդիմության խոսքում մեծապես կա կեղծավորություն, որովհետեւ Արցախը փրկելու համար երեւի ճիշտ ժամանակը չէր 22թ․-ի ապրիլին այս կազմով Արցախ գնալը։ Արցախը փրկելու շատ ժամանակներ են եղել, բայց այս կազմով հիմնականում հակառակ ուղղությամբ են եկել»,-ԱԺ լիագումար նիստում այսօր հայտարարեց «Քաղաքացիական պայմանագիր» խմբակցության պատգամավոր Գեւորգ Պապոյանը։ Նրա խոսքով՝ ընդդիմության գործունեությունը «հակաարցախյան է եւ կեղծավոր»։
Հիշեցնենք՝ ընդդիմադիր երկու խմբակցություններն այսօր հայտարարեցին, որ չեն մասնակցելու այս շաբաթվա նիստերին, մեկնելու են Արցախ եւ ՀՀ սահմանամերձ բնակավայրեր, իսկ ԱԺ ամբիոնին փակցրին Արցախի դրոշը։
Գեւորգ Պապոյանը շարունակեց․ «Արցախի ինքնիշխանությունը հենց այն ժամանակ է դրվել կասկածի տակ։ Ավելի անկեղծ կլինեն, եթե իրենց իրական շեֆերը, ինչպես տարիներ առաջ եկել են Արցախից, հիմա վերադառնան Արցախ եւ իրենց կոչած հայրենանվեր գործունեությունն այնտեղ ծավալեն՝ ոչ թե իրենց շքեղ դղյակներից կամ Երեւանի կենտրոնից փրկեն Արցախը, այլ հենց Ստեփանակերտում։ Արցախի փրկության մասին պետք է մտածեին այն ժամանակ, երբ իրենց սեփական միջոցներն ու Ադրբեջանի ռազմական բյուջեն տարեկան աճում էին մի քանի զրոյով եւ տոկոսով, իսկ ՀՀ ռազմական բյուջեն՝ աննշան տոկոսով։ Իրենց հարստացումն ու ադրբեջանական բանակի հարստացումն ուղիղ համեմատական են եղել»։
Կարդացեք նաև
Լուիզա ՍՈՒՔԻԱՍՅԱՆ
