2019 թվականի Ամանորի գիշերը Այվազյանների ընտանիքում տարեմուտը տոնելիս հետաքրքիր գաղափար ծագեց, որը հետագայում դարձավ իրականություն: Վրույր Այվազյանը պատմում է, որ ամեն տարի ընտանիքով Ամանորի գիշերը բարձրանում են Գյուլագարակ գյուղի իրենց տան ձեղնահարկ, որտեղից երեւում է ամբողջ գյուղը, ապա հրավառություն կազմակերպում եւ այդպես դիմավորում Նոր տարին:
2019 թվականի կեսգիշերին որոշեցին, որը ձեղնահարկը, որն իրենց տան մի մասն է կազմում, դարձնել հյուրատուն: 2020 թ., չնայած համավարակին ու մյոււս դժվարություններին, կյանքի կոչեցին այդ գաղափարը: Քանի որ հյուրատունն արդեն պատրաստ էր, պետք էր մտածել անվան մասին: Վրույրը որոշում է հյուրատունն անվանել Տորմակ` Գյուլագարակ գյուղի 5-6-րդ դարերում կառուցված եկեղեցու անունով: Պատճառն այն էր, որ հյուրատան հիմնադիրը բոլոր կապերով կապված էր հինավուրց եկեղեցուն:
Հյուրատան ներքին հարդարանքն ու կահավորումը հնի ու նորի համադրությամբ է իրականացվել, Տորմակի սենյակներից մեկը զարդարում է գրեթե 100 տարվա պատմություն ունեցող Արփենիկ տատի օժիտը եղած պահարանը, որը իրական սիրո կենդանի վկա է:
Կարդացեք նաև
Վերջերս Վրույրը մասնակցել է «Համայնքային տուրիզմի զարգացում» ծրագրին, որն էլ ավելի է հմտացրել նրան, ավելացրել գիտելիքները` հյուրատան զարգացման համար: Այս տարի նախատեսվում է հյուրատան ծառայությունների մեջ ավելացնել նախաճաշի ծառայությունը եւ տաղավարը: Գարնանը հյուրատունն իր աշխատանքը կսկսի մեծ թափով եւ իր հյուրընկալ դռները կբացի գեղեցիկն ու նրբաճաշակը գնահատող այցելուների առաջ:
Մարիաննա ՄՈՒՐԱԴՅԱՆ
«Առավոտ» օրաթերթ
09.04.2022
